ევროპული საქართველოს ერთ-ერთი ლიდერი, გიგი უგულავა ფეისბუქ პოსტით ერთიანი ნაციონალური მოძრაობის წევრების კომენტარებს გამოეხმაურა, რომელიც დავით ბაქრაძის განცხადებას მოჰყვა. ბაქრაძის თქმით, მერაბიშვილი, ადეიშვილი და სააკაშვილი მომავალ მინისტრთა კაბინეტში არ იქნებიან. უგულავას განცხადებით, ივანიშვილის ერთპიროვნულ მმართველობას არა ნაციონალური მოძრაობისა და მიხეილ სააკაშვილის ერთპიროვნული და ერთპარტიული მმართველობა, არამედ ევროპული კოალიცია ჩაანაცვლებს.

"ჩვენი, ევროპულ საქართველოს და ასევე, სხვა ოპოზიციის უფლება და მოვალეობაა, რომ განგიმარტოთ — ივანიშვილის ერთპიროვნულ და ერთპარტიულ მმართველობას, არა ენმ-ს და სააკაშვილის ერთპიროვნული და ერთპარტიული მმართველობა, არამედ ევროპული კოალიცია ჩაანაცვლებს. ესაა მოსახლების 73% სურვილი", — განაცხადა ევროპული საქართველოს ლიდერმა.

გიგი უგულავამ, ასევე, აღნიშნა, რომ ენმ-ის გარეშე კოალიცია ვერ შედგება, ამიტომ ევროპულმა საქართველომ და ნაციონალურმა მოძრაობამ ერთმანეთის მიმართ პატივისცემა და პოზიციებს შორის მკაფიო განსხვავება უნდა დაადასტურონ.

"ცხადია, ენმ-ის გარეშე კოალიცია ვერ შედგება, ისევე, როგორც კოალიციურ პროპორციებს ამომრჩეველი გადაწყვეტს, ამიტომ დავადასტუროთ ერთმანეთის მიმართ პატივისცემა და მკაფიო განსხვავება ჩვენს პოზიციებს შორის",— წერს უგულავა სოციალურ ქსელში.

ევროპული საქართველოს ერთ-ერთმა ლიდერმა, დავით ბაქრაძემ ღამის კურიერში თქვა, რომ კოალიციური მთავრობის შემთხვევაში, მიხეილ სააკაშვილი, ზურაბ ადეიშვილი და ვანო მერაბიშვილი მინისტრთა კაბინეტში არ იქნებიან, მათ შორის, არც პრემიერმინისტრად. ბაქრაძეს ამ ინტერვიუში ზოგადად ნაციონალურ მოძრაობასთან კოალიციაზე არ უსაუბრია. მიუხედავად ამისა, დღეს ენმ-ს ერთ-ერთი ლიდერი, ხატია დეკანოიძე მას ასე გამოეხმაურა:

"თუ ნაციონალურ მოძრაობას, რომელიც არის ყველაზე დიდი ოპოზიციური პარტია, არ უქმნი კოალიაციას, მაშინ ლოგიკურად არის მეორე, ქართული ოცნება, ბიძინა ივანიშვილი".

პარტიის კიდევ ერთმა ლიდერმა, სალომე სამადაშვილმა კი თქვა, რომ დავით ბაქრაძის მხრიდან მიხეილ სააკაშვილზე თავდასხმა ევროპული საქართველოს მაჟორიტარ კანდიდატებს ძვირი დაუჯდებათ.