თამარ ბაჩალიაშვილის ოჯახის ადვოკატის, მიხეილ რამიშვილის თქმით, ავტომობილი შემთხვევის ადგილას ხუთი დღის განმავლობაში არ იდგა. რამიშვილმა ვიდეო კადრები გაასაჯაროვა, რომელიც ადგილობრივმა გადაიღო. ადვოკატის განცხადებით, აღნიშნული კადრები აჩვენებს, რომ ადგილი სადაც ავტომობილი იდგა, ხუთი დღის განმავლობაში ყველასთვის შეუმჩნეველი ვერ იქნებოდა, რადგან იქ მწყემსები ნახირს მწყემსავენ და თან ძაღლებიც ახლავთ. რამიშვილის თქმით, 5 დღის განმავლობაში ცხედარი იმ ადგილას რომ ყოფილიყო, ძაღლები სუნს იგრძნობდნენ და მიაგნებდნენ. ადვოკატის მტკიცებით, გარდა ამისა, მწყემსებიც შეამჩნევდნენ.

"როცა ავტომობილი 5 დღის წინ შესულია, ისეთ მკაფიო კვალი ვერ რჩება, დროთა განმავლობაში იშლება, თან იქ იყო ორი ავტომობილის კვალი. ამაზე მეტად არ შემიძლია გამოძიებას დავეხმარო იმიტომ, რომ დასრულებულია ის ვარაუდები და ვერსიები, რომ ავტომობილში 5 დღის განმავლობაში იყო ცხედარი. მივმართავ მთავარ პროკურორს, შსს-ს, თვითმკვლელობის ვერსიის არსებობას არანაირი პერსპექტივა არ აქვს და მკვლელობის ვერსიით შეიცვალოს", — განაცხადა რამიშვილმა.

გარდა ამისა რამიშვილმა და ბაჩალიაშვილის ოჯახმა ისაუბრეს იმაზეც, რომ 21 ივლისს, საღამოს თეთრიწყაროს ორ სოფელში ელექტროენერგია გამოირთო და მეორე დღეს, დილით ჩაირთო. ბაჩალიაშვილის დედის თქმით, ეს იყო მიზანმიმართული გამორთვა, რათა ავტომობილი შეუმჩნევლად შეეყვანათ.

"ჩვეულებრივი მოკვდავი რომ ყოფილიყო, აქამდე გამოძიებული იქნებოდა. აქ მაღალი რანგის ადამიანებთან გვაქვს საქმე, რომლებსაც ყველგან მიუწვდებათ ხელი — ექსპრეტიზაზე, ინფორმაციის კომპიუტერიდან წაშლაზე და რომლებიც აშინებენ თეთრიწყაროს მოსახლეობას. ასი პროცენტით დარწმუნებული ვარ, რომ სამსახურთან კავშირში არ არის. ეს მზაკვრული გეგმა დიდი ხნით ადრე შეიმუშავეს, იცოდნენ თამარის ფსიქოტიპი, მისი ხასიათი, ის, რომ სამსახურიდან წამოვიდა... ეს არის თვითმკვლელობის ინსცენირება", — აღნიშნა თამაზაშვილმა.

თამარ ბაჩალიაშვილის ოჯახი და ოჯახის ადვოკატი პროკურორისგან თვითმკვლელობის ვერსიის მკვლელობის ვერსიით შეცვლას მოითხოვენ.