დღის ბოლოს ტელეკომპანია რუსთავი 2-მა თქვა, რომ მათ მიერ დაკვეთილ კვლევაში გადაუწყვეტელი ამომრჩეველი 42%-ია.

მანამდე არხი ამ მაჩვენებელს არ ასახელებდა, ამბობდა რა იმას, რომ ბრიტანულმა კომპანია Survation-მა მხოლოდ იმ ამომრჩევლის ხმები დათვალა, რომლებსაც გადაწყვეტილება უკვე მიღებული აქვთ.

ნაციონალური მოძრაობის დეპუტატი, რომან გოცირიძე რუსთავი 2-თან ამბობს, რომ გადაუწყვეტელი ამომრჩევლის რაოდენობა აუცილებლად უნდა გასაჯაროებულიყო. მისი ვარაუდით, ეს სპეციალურად არ მოხდა.

ევროპული საქართველოს დეპუტატი, სერგი კაპანაძე კი On.ge-სთან აღნიშნავს, რომ "თუ ამ კვლევას ყველა იმ ინფორმაციის საფუძველზე შევაფასებთ, რაც მერეც გავიგეთ", გამოვა, რომ ქართულ ოცნებას 29% აქვს, რაც IRI-ის ბოლო კვლევაში პარტიის შედეგებზე ნაკლებია.

"აქ უბრალოდ კითხვა გააჩინა იმან, როგორც ეს იყო პრეზენტირებული. აშკარად ჩანდა, რომ იყო არაკეთილსინდისიერი მცდელობა, საზოგადოება შეეყვანათ შეცდომაში. ასე გადაუწყვეტელების მოკლება უბრალოდ გაუმართლებელია კვლევის კეთების დროს. შეიძლება ალოკაცია გააკეთო, ეგ კი არაა პრობლემა. მაგრამ როცა არ აქვეყნებ, რის ალოკაციას აკეთებ და რამდენისას, უბრალოდ ჩანს, რომ არაკეთილსინდისიერი მიზანი გამოძრავებს და გინდა შეცდომაში შეიყვანო მაყურებელი. სხვა ახსნა ამას უბრალოდ არ აქვს", — ამბობს ის.

დღე გამოქვეყნებული კვლევის მიხედვით, კითხვაზე — "საპარლამენტო არჩევნები დღეს რომ ტარდებოდეს, რომელ პარტიას მისცემდით ხმას", გამოკითხულთა 52% ქართულ ოცნებას ასახელებს, 19% — ერთიან ნაციონალურ მოძრაობას, 8% კი ევროპულ საქართველოს. ხმათა 5-5% აქვს პატრიოტთა ალიანსსა და ლელოს, ხოლო 4% — ახალ საქართველოს. ასევე, გამოკითხული მოსახლეობის 7% ასახელებს, რომ ხმას სხვა რომელიმე პარტიას მისცემდა.

რუსთავის 2-ის დაკვეთით, კვლევა ბრიტანულმა კომპანიამ Survation-მა 15 ივლისიდან 24 ივლისის ჩათვლით ჩაატარა. თბილისსა და რეგიონებში, საარჩევნო ასაკის მქონე 1 200 რესპონდენტი პირისპირი ინტერვიუების გზით გამოიკითხა. საშუალო ცდომილების ზღვარი +/- 3%-ია.