გიორგი შაქარაშვილის განზრახ მკვლელობისთვის ერთ-ერთ ბრალდებულს, არჩილ გაგნიძეს სახაზინო ადვოკატი დაენიშნა. On.ge-ის პროკურატურაში ამის მიზეზად დაუსახელეს ის, რომ მისმა ადვოკატებმა ხელი არ მოაწერეს არც გაუთქმელობის ოქმს და მათ არც მტკიცებულებები ჩაიბარეს. უწყების ინფორმაციით, დაცვის უზრუნველყოფა ეჭქვეშ რომ არ დამდგარიყო, დაინიშნა სახაზინო ადვოკატი.

პროკურატურის ცნობითვე, როგორც სახაზინო ადვოკატს, ასევე ბრალდებულს მტკიცებულებები გადასცეს და ორივე უკვე გააფრთხილეს გაუთქმელობასთან დაკავშირებით.

On.ge ბრალდებული გაგნიძის ერთ-ერთ ადვოკატს არჩილ მამულაშვილს დაუკავშირდა, რომელმაც განმარტა, რომ ამ ეტაპზე, მათ მტკიცებულებების გადმოცემის მოთხოვნა არ ჰქონიათ.

"ეს არის ჩვენი უფლება და მტკიცებულებები არ მოვითხოვეთ. შესაბამისად, ვერავინ ვერ გვაიძულებდა საქმეში არსებული მტკიცებულებები ძალით გადმოეცა. საქმის შემადგენელი ნაწილი იყო, მათ შორის, გაუთქმელობის ხელწერილი. თუ საქმეს არ მოგვცემდნენ, ვერანაირი გაუთქმელობა ვერ გვექნებოდა. რაც არ მოუციათ, რაზე გაგვაფრთხილებდნენ", — აღნიშნავს ადვოკატი.

პროკურატურამ, 12 აგვისტოს გიორგი შაქარაშვილის საქმეში ბრალდებულთა ადვოკატები საქმის მასალების და მონაცემების გამჟღავნების თაობაზე გააფრთხილა. მათი ინფორმაციით, საქმის მასალების საჯარო განხილვები დაზარალებულთა ხელახალ ვიქტიმიზაციას იწვევს და აზიანებს გამოძიებაში მონაწილე ფიგურანტი არასრულწლოვანი პირების საუკეთესო ინტერესების დაცვას.

შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმეს. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.