ქართული ოცნების დეპუტატი, მამუკა მდინარაძე მიიჩნევს, რომ ლარის კურსთან მიმართებით გამოწვევები არის, თუმცა მდინარაძის აზრით, გაუფასურებას მხოლოდ საქართველოს ეროვნული ვალუტა არ განიცდის. ამის შესახებ მდინარაძემ დღეს, პარლამენტის პლენარულ სხდომაზე ისაუბრა:

"მე მინდა მონაცემები, რომლებიც თქვენთვის ყველასთვის ცნობილია, 2010 წლის ამავე პერიოდს შევადაროთ:

  • აზერბაიჯანული მანათი [დოლართან მიმართებაში] 0,8 - დღეს 1,77
  • თურქული ლირა 1,52 - დღეს 3,48
  • სომხური დრამი 359 - დღეს 484,9
  • რუსული რუბლი 30 - დღეს 60
  • უკრაინული გრივნა 7,97 - დღეს 26,2
  • ევროც კი გაუფასურდა დოლართან მიმართებაში 0,75 - დღეს 0,92
  • და ლარი 1,76 - დღეს 2,55

მე არ ვსაუბრობ, რომ რა კარგია, რომ ეს ასე ხდება. ბუნებრივია ჩვენ ვხედავთ რეალობას, ჩვენ ვხედავთ გამოწვევებს და ჩვენ მზად ვართ, რომ ამ გამოწვევების წინაშე გადავდგათ ქმედითი ნაბიჯები იმისთვის, რომ საქართველო მართლაც გავიდეს განვითარების ახალ ეტაპზე და ჩვენ გამოწვევებს ვუპასუხოთ ადეკვატურად."

ეროვნული ბანკის 14 დეკემბრის მონაცემებით, ერთი დოლარის ფასი 2,6599 ლარია.

ეროვნული ბანკი და მთავრობა ამტკიცებენ, რომ ლარის მკვეთრი გაუფასურება დოლარის გამყარებამ გამოიწვია. თუმცა, თავად ეროვნული ბანკის მონაცემები აჩვენებს, რომ ბოლო ერთი თვის განმავლობაში ლარი არა მხოლოდ დოლართან, არამედ ჩინური იუანთან, გირვანქა სტერლინგთან, ისრაელის შეკელთან და სხვა ვალუტებთან მიმართებაშიც გაუფასურდა.