ხაშურში ბენზინმზიდს ცეცხლი გაუჩნდა. საგანგებო სიტუაციების მართვის სამსახურის განცხადებით, ხანძარი უკვე ლიკვიდირებულია.

როგორც უწყებაში აცხადებენ, ცეცხლმოკიდებული 40-ტონიანი ბენზინმზიდი ცისტერნა ერთ-ერთი ბენზინგასამართი სადგურიდან, დაახლოებით, 70 მეტრის მოშორებით, პარკინგზე, იდგა.

ხანძრის ქრობის სამუშაოებში ჩართული იყო 5 სახანძრო-სამაშველო ჯგუფი. მობილიზებული იყო საპატრულო პოლიცია. მათივე განმარტებით, უსაფრთხოების მიზნით საშიში ზონებიდან გაყვანილი იყო მოსახლეობა.

მომხდარზე გამოძიება საქართველოს სისხლის სამართლის კოდექსის 188-ე მუხლის მე-2 ნაწილით მიმდინარეობს, რაც გულისხმობს გაუფრთხილებლობით ნივთის დაზიანებას ან განადგურებას ცეცხლთან ან მომეტებული საფრთხის წყაროსთან გაუფრთხილებელი მოპყრობით.

ისჯება ჯარიმით ან გამასწორებელი სამუშაოთი ვადით ორ წლამდე ან შინაპატიმრობით ვადით ერთიდან ორ წლამდე ანდა თავისუფლების აღკვეთით ვადით ორ წლამდე.