მესტიაში მყოფ ტურისტებს მუნიციპალიტეტის დატოვებამდე სავალდებულო კარანტინის გავლა მოუწევთ. რაც შეეხება შესვლას, ახალი ვიზიტორები მესტიაში შესვლას დროებით ვეღარ შეძლებენ. ამასთან, კარანტინს გაივლის ყველა ის პირი, რომელიც მესტიას დატოვებს.

როგორც დღეს მთავრობის ადმინისტრაციაში განაცხადეს, ტურისტების კარანტინში განთავსებას შესაბამისი უწყებები უზრუნველყოფენ. მათივე თქმით, ყველა ადამიანს ექნება შესაძლებობა, ან ადგილზე გაიაროს კარანტინი, ან მათ ორგანიზებულად გადაიყვანენ საკარანტინო სივრცეებში.

"ჯერჯერობთ ყველა ტურისტს მოვუწოდებთ იყვნენ მშვიდად, გააგრძელონ ადგილზე ყოფნა. უკვე ჩართულია ყველა უწყება. ამ ეტაპზე სასურველია ყველა დარჩეს თავის ადგილას და ჩვენ დეტალურ ინფორმაციას მივაწვდით", — განაცხადა სუს-ის უფროსის მოადგილე ალექსანდრე ხოჯევანიშვილმა.

მან მოუწოდა მოქალაქეებს, რომლებიც ბოლო ორი კვირის განმავლობაში იმყოფებოდნენ უშგულში, დაბა მესტიასა და სოფელ ლენჯერში, ნებისმიერ სიმპტომების გამოვლენის შემთხვევაში, ტესტირებისთვის მიმართონ ცხელების ცენტრებს ან დაუკავშირდნენ 112-ს.

გარდა ამისა, ხოჯევანიშვილი მოუწოდებს მოსახლეობას, აქტიურად გამოიყენონ აპლიკაცია StopCov.ge, "რათა თავი აარიდონ ინფიცირებულ პირთან შესაძლო კონტაქტს და იმ სივრცეში გადაადგილებას, სადაც ინფიცირების მაღალი რისკია".