საქართველოს თავდაცვის მინისტრმა ჟურნალისტებს "პუტინისტები" უწოდა. მედიის კითხვა ეხებოდა აგვისტოს ომთან დაკავშირებით მთავრობის განცხადებებში პუტინის არხსენებას. ამ კითხვას ირაკლი ღარიბაშვილმა არ უპასუხა, თუმცა ყოფილი ხელისუფლება გააკრიტიკა და თქვა, რომ ნახა, "როგორ გამორბოდნენ" ისინი.

ამის შემდეგ მას ჰკითხეს, რატომ არაფერს ამბობს პუტინის როლზე აგვისტოს ომში. კითხვას თავდაცვის მინისტრმა არ უპასუხა, თუმცა ჟურნალისტებს მიაძახა:

"პუტინისტები ხართ თქვენ".

მოგვიანებით მან დააზუსტა, რომ ამ განცხადებაში მთავარ არხს, ტელეკომპანია ფორმულას და ნაციონალურ მოძრაობას გულისხმობდა. თავდაცვის მინისტრს მიაჩნია, რომ პუტინის საქართველოში შემოსვლა მათ განაპირობეს.

"რუსული ოკუპაცია განაპირობა თქვენმა ბელადმა, სააკაშვილმა და თქვენი ტელევიზიის დამფინანსებელმა, კეზერაშვილმა, რომელმაც ჩვენი გმირი ჯარისკაცები მიატოვა ომში. ჟურნალისტებს არ ვუწოდე, მე ვუწოდე მთავარ არხს, ფორმულას და ნაცმოძრაობას. იმიტომ რომ თქვენ განაპირობეთ პუტინის შემოსვლა საქართველოში", — თქვა ღარიბაშვილმა.

დღეს პრეზიდენტი, პრემიერიმინისტრი, მთავრობისა და პარლამენტის წარმომადგენლები მუხათგვერდის ძმათა სასაფლაოზე იმყოფებოდნენ, სადაც აგვისტოს ომში დაღუპულთა ხსოვნას პატივი მიაგეს.