კომპანია ZAG-ის ადვოკატი, მამუკა ჭაბაშვილი აცხადებს, რომ სამართალდამცავებმა ჩხრეკის დროს კომპიუტერები ამოიღეს. მისი თქმით, იქიდან გამომდინარე, რომ სასამართლო განჩინებაში ჩხრეკის შესახებ არაფერი ეწერა, გაუგებარია, რა კავშირშია იგი გამოძიებასთან.

"რაც შეეხება, რა ამოიღეს, გვითხრეს, რომ ორი ლეპტოპი იყო. ერთი ბავშვის იყო და თუ არ ვცდები, არ მუშაობს, მეორე თავისი პირადი [კომპანიის დირექტორის] ლეპტოპი", — აღნიშნა ადვოკატმა.

მისივე თქმით, არ იცის, რატომ შეირჩა კონკრეტულად ეს ხუთი თანამშრომელი და რატომ ჩატარდა ჩხრეკა მათ სახლებში. ადვოკატი აღნიშნავს, რომ ამ შეკითხვებზე მოსამართლემ უნდა გასცეს პასუხები.

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლელობამდე მიყვანის მუხლი დაემატა.

ჯერ კიდევ ძებნის პროცესში გამოძიებამ ამოიღო ბაჩალიაშვილის კომპიუტერი, თუმცა ოჯახი აცხადებდა, რომ მისი გახსნა ვერ შეძლეს. მოგვიანებით კი მამამ მედიასთან თქვა, რომ პოლიციელის თქმით, მისი შვილი "დიდ შარში იყო". ოჯახის ადვოკატი კომპიუტერის გახსნის პროცესზე დასწრებას ითხოვდა, თუმცა, მიხეილ რამიშვილის განცხადებით, ლუქი მის გარეშე მოხსნეს.