მწერალი ნიკა ჩერქეზიშვილი, რომელიც საგარეო საქმეთა სამინისტროს ადმინისტრაციულ დეპარტამენტში სახელმწიფო შესყიდვების უზრუნველყოფის დეპარტამენტის უფროსად მუშაობდა და სამსახურიდან გაათავისუფლეს, აღნიშნულს სახელმწიფო კანცელარიის წინ აპროტესტებს. მან მთავრობის შენობის წინ ღამე გაათენა.

"ახლა საშინლად ყინავს ქუჩაში, მინუს ტემპერატურაა და ჩემი სუსტი ჯანმრთელობით, ალბათ, მაქსიმუმ ოთხ-ხუთ დღეს გავძლებ იქ, მაგრამ ასეთი ოთხი-ხუთი დღის სიცოცხლეც კი მირჩევნია სიბერემდე მუხლებსა და უკანალზე გამობერილი ბამბის შარვლით ოთახიდან ოთახში სიარულს" - წერს ნიკა ჩერქეზიშვილი ფეისბუკზე.

მან სამსახურიდან გათავისუფლების შემდეგ უკვე მიმართა უწყების მინისტრს, ასევე პრემიერმინისტრ გიორგი კვირიკაშვილს და საქალაქო სასამართლოს, სადაც მის უფლებებს საერთაშორისო გამჭვირვალობა-საქართველოს იურისტი თეო ზაქარაშვილი იცავდა.

იურისტის თქმით, ჩერქეზიშვილი 2015 წლის 29 ოქტომბერს გაათავისუფლეს, გადაწყვეტილების მიზეზი კი გამოსაცდელი ვადის არადამაკმაყოფილებლად გავლა გახდა, თუმცა თავად ნიკა ჩერქეზიშვილი ამ ფაქტს უსამართლობას და 4-5 კაცის გადაწყვეტილებას უკავშირებს:

"თითქმის წელიწადნახევარია გავდივარ სხვადასხვა კონკურსზე და მიუხედავად ნაჩვენები დადებითი შედეგებისა, ვერ ვიწყებ მუშაობას, იმის გამო, რომ გაფუჭებული და გაშავებული მაქვს პირადი საქმე. ამ მოცემულობით, ფაქტობრივად, შანსი არ მაქვს, რომ დავსაქმდე და ვაკეთო ის საქმე, რაც მიყვარს და რაც კარგად ვიცი".

ნიკა ჩერქეზიშვილი სამთავრობო სისტემაში 12 წლის განმავლობაში მუშაობდა, საგარეო საქმეთა სამინისტროდან გათავისუფლებამდე, ის იუსტიციის სამინისტროში იყო დასაქმებული.

საქალაქო სასამართლომ პირველი ინსტანციის გადაწყვეტილება 5 დეკემბერს გამოიტანა და უარი უთხრა ნიკა ჩერქეზიშვილს სარჩელის დაკმაყოფილებაზე, თუმცა მას და იურისტს დასაბუთებული გადაწყვეტილება ჯერ არ ჩაბარებიათ:

"ამ ეტაპზე ვერ გეტყვით, რა არგუმენტებზე დაყრდნობით გვითხრა სასამართლომ სარჩელის დაკმაყოფილებაზე უარი, ვაპირებთ სააპელაციოში გასაჩივრებას".

თბილისის სოლიდარობის ფონდი დღეს მის მხარდამჭერ აქციას გამართავს. ნიკა ჩერქეზიშვილი დასძენს, რომ მისი პროტესტი აბსოლუტურად მშვიდობიანია და მოუწოდებს ყველა მხარდამჭერს, რომ არ დაარღვიოს საზოგადოებრივი წესრიგი.

ფოტოზე ნიკა ჩერქეზიშვილის მხარდამჭერი ირაკლი ბერია.