ცნობილმა ამერიკელმა მსახიობმა, დრიუ ბერიმორმა, თავისი თოქ-შოუს პირველი პრომო ვიდეო გაავრცელა.

პრომოში 45 წლის მსახიობი 7 წლის ასაკში მყოფ საკუთარს თავს ინტერვიუს ართმევს. ვიდეოში გამოყენებულია ბერიმორის ცნობილი ინტერვიუ ჯონი კარსონის The Tonight Show-ში. პოპულარულ სატელევიზიო გადაცემაში იგი 1982 წელს მიიწვიეს, მას შემდეგ რაც სტივენ სპილბერგის E.T.-ში როლი განასახიერა.

დრიუ ბერიმორის შოუ 14 სექტემბრიდან გავა ეთერში და როგორც მას აღწერენ, იქნება "ოპტიმისტური გადაცემა, რომელიც ინფორმაციულ, შთამაგონებელ და გასართობს კონტენტს მიაწოდებს მაყურებლებს... და მუდამ ეცდება, ნებისმიერი ადამიანის ყოველდღიურობაში მხიარულება შეიტანოს". შოუს ფორმატი საზოგადოებისთვის საინტერესო თემების განხილვას, სახალისო ამბებს, ცხოვრებისეულ რჩევებს და ცნობილი ადამიანების სტუმრად მოწვევას ითვალისწინებს.

პრომო ვიდეოს გამოქვეყნებამდე, ბერიმორმა რამდენიმე ვიდეო გაავრცელა, მათ შორის — როგორ იქმნება მისი თოქ-შოუ (The Making of The Drew Barrymore Show) და საუბრები ცნობილი თოქ-შოუების იმ წამყვანებთან, რომელთა შთაგონებითაც საკუთარი შექმნა (The Art of the Interview). ამ უკანასკნელში ისეთი ვარსკვლავები ჩნდებიან, როგორებიც გეილ კინგი, ენდი კოენი, ჯიმი ფელონი, ვუპი გოლდბერგი და შონ ევანსი არიან. ვიდეოები დრიუ ბერიმორის შოუს ოფიციალურ ვებგვერდზეა ხელმისაწვდომი.