სპორტის სასახლეში უკვე დაიწყო ქართული ოცნების მეოთხე ყრილობა, მისი დაწყების პარალელურად კი, სპორტის სასახლის მიმდებარედ, ცენტრ პოინტისგან დაზარალებული მოქალაქეები აქციას მართავენ და განმარტავენ, რომ ხელისუფლებაში თაღლითების მფარველები არიან.

სპორტის სასახლესთან მოძრაობა გადატვირთულია, სამართალდამცავი ორგანოები კი უსაფრთხოების ზომებს იცავენ. დარბაზში უკვე შეიკრიბნენ ქართული ოცნების, მედიისა და საზოგადოების წარმომადგენლები. ყრილობის გახსნამდე დარბაზში ირაკლი ჩარკვიანის სიმღერა - თავისუფლებაა ჩართული.

ცნობილია, რომ ყრილობაზე პოლიტსაბჭოს ახალ შემადგენლობას აირჩევენ, საარჩევნო სიაში შემავალი პირების ვინაობა კი დღეს არ გაცხადდება. ამის შესახებ ჟურნალისტებს დღეს პარლამენტის ვიცე სპიკერმა, მანანა კობახიძემ განუცხადა.

კოალიციის აღმასრულებელი მდივნის, ირაკლი კობახიძის განმარტებით კი, ყრილობაზე მოსაწვევები ყოფილ პრემიერ მინისტრებს, ბიძინა ივანიშვილსა და ირაკლი ღარიბაშვილსაც გაუგზავნეს. კობახიძე იმედოვნებს, რომ ისინი ყრილობაზე მივლენ.