ყველაზე ახალგაზრდა მუსიკოსმა, რომელმაც გრემიზე წლის საუკეთესო ალბომის ნომინაციაში გაიმარჯვა, ახალი სინგლი გამოუშვა. my future ბილი აილიშმა თვითიზოლაციაში დაწერა, პროდიუსერი კი, აილიშთან ერთად, მისი ძმა ფინიას ო'კონელია. სიმღერაში ახალგაზრდა მუსიკოსი მომავალზე მღერის, რომელიც მისთვის ძვირფასია, რადგან მარტოობაში საკუთარი თავის აღმოჩენას უძღვნის.

"ეს სიმღერა ჩემთვის განსაკუთრებული და ძალიან პირადია. როდესაც ის დავწერეთ, ის სრულად ასახავდა იმ მდგომარეობას, რომელსაც ვგრძნობდი — იმედიანი და აღტაცებული ვიყავი საკუთარი თავის აღმოჩენითა და ზრდით. ამ ბოლოს კი მან ახალი მნიშვნელობა შეიძინა იმ კონტექსტით, რაც ახლა მსოფლიოში ხდება. ამიტომ, იმედი მაქვს, რომ ის თქვენთვისაც მნიშვნელოვანი იქნება", — ამბობს ბილი აილიში.

ანიმაცია ენდრიუ ონორატოს ეკუთვნის.

აილიშს სადებიუტო ალბომმა WHEN WE ALL FALL ASLEEP, WHERE DO WE GO? ამერიკის ხმისჩამწერი აკადემიის რეკორდული გამარჯვება და ხუთი გრემი მოუტანა. ამის შემდეგ აილიშმა გამოუშვა სინგლი everything I wanted და ჯეიმს ბონდის ფილმისთვის ჰანს ციმერთან ერთად საუნდტრეკი No Time to Die დაწერა.