ამერიკის შეერთებული შტატები მოსკოვს ალტერნატიული ვებსაიტების გამოყენებით პანდემიის პროპაგანდის კამპანიის წარმართვაში ადანაშაულებს. ამის შესახებ Associated Press და NY Times ანონიმურ წყაროზე დაყრდნობით წერს. მათი განმარტებით, რუსული დაზვერვა, არჩევნების მოახლოებასთან ერთად, ცდილობს ამერიკელ ხალხზე გავლენა დეზინფორმაციით მოახდინოს.

Associated Press-ის ცნობით, GRU-ს სახელით ცნობილი რუსული სამხედრო-სადაზვერვო სამსახურის ორი მაღალჩინოსანი რუსეთის მთავრობის საინფორმაციო ცენტრთან კავშირებს იყენებს, რათა Inforos-ისა და სხვა ვებსაიტების საშუალებით, პანდემიის შესახებ ინგლისურ ენაზე დეზინფორმაცია გავრცელდეს. მათ შორის, საუბარია ისეთ ყალბ ამბებზე, როგორიცაა, ვერსია, რომ კორონავირუსი აშშ-ს სამხედრო ლაბორატორიაში შექმნილი იარაღია. ასევე, სტატიები, სადაც ნათქვამია, რომ რუსეთის სამედიცინო დახმარებას ვაშინგტონში სიტუაციის გაუმჯობესება შეუძლია. გამოცემების ინფორმაციით, მაისიდან ივლისამდე მსგავსი შინაარსის 150-მდე სტატია გამოქვეყნდა და იგი რუსეთის უპირატესობის დამტკიცებისა და აშშ-ს ცილისწამების მცდელობას ემსახურეობდა.

უცხოური პრესა წერს, რომ რუსული დაზვერვის მიერ შექმნილი ყალბი ამბების უმრავლესობა ქვეყნდება Inforos-ზე. ისინი აღნიშნული ვებსაიტის რუსეთის ხელისუფლებასთან კავშირზე საუბრობენ. შემდეგი საიტი, რომელსაც აშშ-ს ოფიციალური პირები ასახელებენ OneWorld.Press-ია. მომდევნოა, GlobalResearch.ca. აშშ-ს ოფიციალური პირების განცხადებით, მიუხედავად იმისა, რომ საიტი რეგულარულად აძლიერებს G.R.U. პროპაგანდას, რუსულ დაზვერვასთან პირდაპირ დაკავშირება ჯერ ვერ შეძლეს.

მათი განცხადებით, ეს არ არის პირველი შემთხვევა, როცა რუსეთი დეზინფორმაციას თავის იარაღად იყენებს და 2016 წელსაც ინტენსიურად ცდილობდნენ სოციალური ქსელები და ბოტები საკუთარი ინტერესების სასარგებლოდ გამოეყენებინათ. ინტერნეტ კვლევის სააგენტოს განცხადებით, ძველი მცდელობა დეზინფორმაციის გავრცელებისა, შედარებით მარტივად აღმოსაფხვრელი იყო, რადგან საქმე ყალბი ანგარიშების გაფილტვრას ეხებოდა. პანდემიის პერიოდში კი რუსეთმა სტატიების ვებსაიტებზე განთავსება დაიწყო და იმის ფონზე, რომ საიტები ლეგიტიმურად გამოიყურება, დეზინფორმაციის გავრცელების მასშტაბებიც იზრდება და რთულად მართვადი ხდება.