საქართველოში კორონავირუსით ინფიცირებულთა საერთო რაოდენობის 11,2%-ს სამედიცინო პერსონალია. სრულად სამედიცინო მომსახურების მიმწოდებელი სამსახურების თანამშრომლების დასნეულების 129 შემთხვევა გამოვლინდა, რომელთაგან ერთი, 70 წლის ქალი ქვემო ქართლიდან, გარდაიცვალა. ინფორმაცია ამის შესახებ დაავადებათა კონტროლის ეროვნული ცენტრის ანგარიშშია მოცემული.

დაინფიცირებულებს შორის, 111 არის სამედიცინო უშუალოდ პერსონალი, 18 — ტექნიკური. ამასთან, NCDC-ის დოკუმენტის მიხედვით, სამედიცინო პერსონალის დაინფიცირების ერთ შემთხვევაში ვირუსი საზოგადოებაში აღმოჩნა შეძენილი. შესაბამისად, სამედიცინო მომსახურების მიწოდებისას ინფიცირებული სამედიცინო პერსონალის რაოდენობა არის 110.

პროფესიული ჯგუფების მიხედვით, შემთხვევების ნახევარზე მეტი ექთნებზე მოდის. სამედიცინო პერსონალის ინფიცირების ყველაზე ბევრი შემთხვევა აპრილში დაფიქსირდა — 17,1%.

სამედიცინო პერსონალის ინფიცირების ყველაზე ბევრი, 57 შემთხვევა კოვიდ კლინიკებშია დაფიქსირებული, სასწრაფო დახმარების სამსახურებში 26 შემთხვევა დაფიქსირდა, არაკოვიდკლინიკებში — 15, სოფლის ამბულატორიებში კი — 2.

დაავადებათა კონტროლის ეროვნული ცენტრის ინფორმაციით, ეს ანგარიში საქართველოში ახალი კორონავირუსის გავრცელებასთან დაკავშირებული ეპიდემიოლოგიური სიტუაციის და განხორციელებული ღონისძიებების ანალიზის მესამე გადახედვაა და მასში მონაცემები ასახულია 2020 წლის 11 ივლისის მდგომარეობით. შესაბამისად, დოკუმენტში ყველა მაჩვენებელი წარმოდგენილია საანგარიშო პერიოდისთვის, თუ სხვაგვარად არ არის მითითებული. NCDC-ში ამბობენ იმასაც, რომ ამ ტიპის ანალიზი პანდემიის პერიოდში რეგულარულად განახლდება.