დაავადებათა კონტროლისა და საზოგადოების ჯანმრთელობის ეროვნული ცენტრის ინფორმაციით, საქართველოში იმპორტირებული კორონავირუსის შემთხვევების უდიდესი წილი რუსეთზე მოდის. NCDC-ის ანგარიშში აღნიშნულია, რომ იმპორტირებული 272 შემთხვევიდან 127-ის, ანუ 46,6%-ის წყარო რუსეთია.

ანგარიშიდან ვიგებთ, რომ იმპორტირებული შემთხვევების რიცხვის მიხედვით, რუსეთის შემდეგ ლიდერობენ თურქეთი — 23 შემთხვევით (8,4%), აზერბაიჯანი — 22 შემთხვევით (8%) და სომხეთი — 21 შემთხვევით (7,7%).

NCDC-ის განცხადებით, ანგარიშში მონაცემები ასახულია 2020 წლის 11 ივლისის მდგომარეობით. მათივე თქმით, დოკუმენტი საქართველოში ახალი კორონავირუსის გავრცელებასთან დაკავშირებული ეპიდემიოლოგიური სიტუაციის და განხორციელებული ღონისძიებების ანალიზის მესამე გადახედვაა. შესაბამისად, დოკუმენტში ყველა მაჩვენებელი წარმოდგენილია საანგარიშო პერიოდისთვის, თუ სხვაგვარად არ არის მითითებული. NCDC-ში ამბობენ იმასაც, რომ ამ ტიპის ანალიზი პანდემიის პერიოდში რეგულარულად განახლდება.