NDI-ს კვლევის თანახმად, მოსახლეობის მხოლოდ 10 პროცენტს სჯერა, რომ 5G-ის ინტერნეტის ინფრასტრუქტურა კორონავირუსის გავრცელებასთანაა დაკავშირებული.

მოსახლეობის 45 პროცენტი აღნიშნულ მოსაზრებას არ ეთანხმება, ხოლო 30-მა პროცენტმა არ იცის. 16 პროცენტი ამბობს, რომ არ სმენია 5G-ის შესახებ.

ამავე კვლევაში საუბარია მოსახლეობის შეხედულებებზე დეზინფორმაციასა და კორონავირუსს შორის კავშირზე.

მოსახლეობის 35 პროცენტი არ ფიქრობს, რომელიმე უცხო ქვეყანა კორონავირუსის შესახებ საქართველოში დეზინფორმაციასა და ცრუ ინფორმაციას შეგნებულად ავრცელებს. 29 პროცენტს კი მიაჩნია, რომ უცხო ქვეყანა შეგნებულად დეზინფორმაციას ავრცელებს.

ფოტო: NDI

იმ მოქალაქეებიდან, ვისაც მიაჩნია, რომ საქართველოში უცხო ქვეყანა ცრუ ინფორმაციას შეგნებულად ავრცელებს, 33 პროცენტი ამის წყაროდ რუსეთს ასახელებს. ამასთან, 36-მა პროცენტმა არ იცის რომელი ქვეყანაა დეზინფორმაციის მიზანმიმართულად გამავრცელებელი.

ფოტო: NDI

NDI-მ კვლევისთვის სატელეფონო გამოკითხვა და ფოკუს ჯგუფების მეთოდოლოგია გამოიყენა. სატელეფონო გამოკითხვის შემთხვევაში, საველე სამუშაოები 26-30 ივნისს ჩატარდა და შედგა 1 550 დასრულებული ინტერვიუ. ორგანიზაციის ინფორმაციით, რესპონდენტები შემთხვევით ნომერზე დარეკვის მეთოდით შეირჩა და ინტერვიუები ჩატარდა ქართულ, აზერბაიჯანულ, სომხურ და რუსულ ენებზე. კვლევა საქართველოს მთლიანი მოსახლეობის წარმომადგენლობითია (ოკუპირებული ტერიტორიების გამოკლებით). გარდა ამისა, კვლევა წარმომადგენლობითია თბილისის, ურბანული და სოფლის ტიპის დასახლებებისთვის. საშუალო ცდომილების ზღვარი +/- 2%-ია, თუმცა იცვლება სხვადასხვა კითხვის მიხედვით.

რაც შეეხება ფოკუს ჯგუფებს, საველე სამუშაოები 24-30 ივნისს, ხუთ ქალაქში ჩატარდა: თბილისი, ზუგდიდი, ბათუმი, მარნეული, ახალქალაქი. თითოეულ ქალაქში 2 ფოკუს ჯგუფი იყო: შერეული ასაკი, სქესი და დასაქმების სტატუსი. მონაწილეები შეარჩიეს ორი მეთოდით: CRRC-ის კოორდინატორები მიდიან ქალაქის რამდენიმე ცენტრალურ ადგილას, შემთხვევითად აჩერებენ ადამიანებს და ჯგუფურ დისკუსიაში მონაწილეობას სთავაზობენ და "თოვლის გუნდის" მეთოდი. ფოკუს ჯგუფში დისკუსიას პროფესიონალი მოდერატორი უძღვებოდა, ღია კითხვებით.