პრემიერ-მინისტრის მრჩეველი, ირაკლი ჩიქოვანი ეხმაურება მედიაში გავრცელებულ ინფორმაციას, თითქოს რუსეთი, საქართველოს გავლით, სომხეთში, 300 ერთეული სამხედრო მანქანის გადასაყვანად ემზადება. ირაკლი ჩიქოვანი აზერბაიჯანთან სტრატეგიულ პარტნიორობას უსვამს ხაზს.

"საქართველოს აქვს სტრატეგიული პარტნიორობა აზერბაიჯანის რესპუბლიკასთან, ჩვენი პოზიცია შეუქცევადია, რომ კავკასიაში მშვიდობას ალტერნატივა არ აქვს. სამწუხაროდ, ეს არ არის პირველი შემთხვევა, როდესაც კონკრეტული მედიასაშუალებები ცდილობენ ინფორმაციის დამახინჯებას და შესაბამისად, ისე წარმოჩენას, რა ინტერესიც მათ გააჩნიათ. მინდა, ხაზგასმით აღვნიშნო, რომ საქართველოს პოზიცია არის ნათელი, განმარტებული და ჩვენი ყველა პარტნიორისათვის თვალსაჩინო", — აღნიშნა ირაკლი ჩიქოვანმა.

სომხეთ-აზერბაიჯანის საზღვარზე მიმდინარე კონფლიქტთან დაკავშირებით ერთ-ერთმა აზერბაიჯანულმა გამოცემამ, haqqin.azz სარედაქციო წერილი გაავრცელა. რედაქციის მტკიცებით, აქვთ ინფორმაცია, რომ სომხეთმა აზერბაიჯანზე თავდასხმისთვის მზადება რამდენიმე დღით ადრე დაიწყო და საბრძოლო დახმარება სერბეთიდან საქართველოს გავლით მიიღო.

საქართველოს საგარეო საქმეთა სამინისტრომ არ დაადასტურა ეს ინფორმაცია და განაცხადა, რომ სტატია ტენდენციურ ხასიათს ატარებს და ორ სტრატეგიულ პარტნიორ შორის პრობლემების ხელოვნურად შექმნისკენაა მიმართული.

ამის პასუხად გამოცემამ ფოტო გაავრცელა, რომელიც, სავარაუდოდ, სომხეთ-საქართველოს საზღვარზეა გადაღებული და ჩანს სატვირთო მანქანა. მათი მტკიცებით, სწორედ ამ მანქანებით გადაჰქონდათ იარაღი.