მასკის ტვიტერის გვერდი ერთობ უცნაური ადგილია; ტესლასა და SpaceX-თან დაკავშირებულ სიახლეებს შორის ამერიკელი მილიარდელი ხშირად აქვეყნებს სახალისო მიმებს და ისეთ საკამათო განცხადებებს, რომლებსაც კომენტარებში აღშფოთებული უცნობებისა და მასკის თავდადებული ფანების ორთაბრძოლა მოჰყვება ხოლმე.

მაგალითად, ამას წინათ მასკმა განაცხადა, რომ პანდემიის პირობებში აშშ-ის მთავრობის მიერ საზოგადოებისთვის განკუთვნილი ეკონომიკური დახმარების მორიგი პაკეტი "ხალხის ინტერესებს არ ემსახურებოდა". ამას მასობრივი საპასუხო რეაქცია მოჰყვა, რომლის დროსაც ტვიტერის მომხმარებლები მასკს მის ფინანსურად პრივილეგირებულ მდგომარეობაზე დამცინავად მიუთითებდნენ:

ტვიტერის მომხმარებელი: "ხალხის ინტერესებს არ ემსახურება lol. ილონ, გულწრფელად თქვი, ერთხელ მაინც გიმუშავია მომსახურების სფეროში?"

ამჯერად კი მასკის ახალი ტვიტი, "ნაცვალსახელები ტეხავს", ზოგმა ტრანსგენდერი და არაბინარული გენდერული იდენტობის მქონე ადამიანების წინააღმდეგ გამიზნულ სიტყვებად აღიქვა. იგივე დასკვნა გამოიტანა გრაიმსმაც, რომელმაც თავისი შვილების მამას ტვიტითვე ამ სიტყვებით უპასუხა: "მიყვარხარ, მაგრამ ტელეფონი გათიშე ან დამირეკე. სიძულვილს ვერ გავამართლებ. გთხოვ, გეყოს. ვიცი, რომ ასეთი არ ხარ".

გრაიმსმა ტვიტი მალევე წაშალა, რისი მიზეზიც იმის გაცნობიერება შეიძლებოდა ყოფილიყო, რომ ის და მასკი, ორივე, საქვეყნოდ ცნობილი ადამიანები არიან და ტვიტერზე ყველას დასანახად ჩხუბის დაწყება კარგი იდეა არ იქნებოდა.

თუმცა, რა თქმა უნდა, უკვე გვიანი იყო. ის, რაც ინტერნეტში ცოტა ხნით მაინც ხვდება, უკვალოდ არასოდეს ქრება. მართლაც, ტვიტერის ბევრმა მომხმარებელმა მოასწრო მიმოწერისთვის ფოტოს გადაღება.

სიტუაცია იმანაც დაამძიმა, რომ მიმოწერა მასკის The New York Times-ში გამოქვეუნებულ ინტერვიუს დაემთხვა, რომლის სათაურიც "ილონ მასკი ოჯახური იდილიის ზენიტშია" გახლდათ. ინტერვიუში მასკი და გრაიმსი ახირებულ, თუმცა კი იდეალურ წყვილადაა გამოყვანილი.

ტვიტებისა და ინტერვიუს ტონებს შორის კონტრასტი სოციალური ქსელის მომხმარებლებისთვის ზედმეტად კომიკური აღმოჩნდა იმისთვის, რომ უპასუხოდ დაეტოვებინათ:

ტვიტერის მომხმარებელი: "გრაიმსი ილონ მასკს ამ ღამით დასაძინებლად ქვედა სართულზე, ჰიპერბარიულ ჟანგბადის საკანში გაამწესებს".

ტვიტერის მომხმარებელი: "გრაიმსმა და ილონმა ტვიტერზე ერთმანეთი დაბლოკეს".

ტვიტერის მომხმარებელი: "ვგონებ, სასაცილოც კია, იმაზე დაკვირვება, წლების განმავლობაში ძვირადღირებული პიარის მეშვეობით ილონ მასკისა და ჯოან როულინგის მსგავსმა მდიდარმა სულელმა ადამიანებმა როგორი წარმატებით შექმნეს მათი პერსონების გარშემო ლეგენდები; მერე კი ეს მთლიანი წარმოდგენა ერთი ხელის მოსმით გაანადგურეს მხოლოდ იმის გამო, რომ სოციალური ქსელიდან გასვლა არ ისურვეს".

მთელი ეს ისტორია იმის კარგი მაგალითია, თუ რამხელა სიფრთხილეა საჭირო სოციალური მედიის გამოყენებისას — განსაუკთრებით მაშინ, თუ მთელი პლანეტის მასშტაბით ცნობილი ადამიანი ხარ.