ცსკა-ს პრეზიდენტის, ანდრეი ვატუნინის განცხადებით, მზად არიან თორნიკე შენგელია სანაკრებო თამაშებზე გაუშვან, თუ ევროლიგაში კლუბის თამაშებს არ დაემთხვევა. ამის შესახებ მან Sports.ru-სთან ინტერვიუს დროს ისაუბრა.

"ჩვენ მზად ვართ "ფანჯრების" დროს სანაკრებო თამაშებზე გავუშვათ, თუმცა ერთი პირობით, რომ ის ევროლიგაში ცსკა-ს მატჩს არ დაემთხვევა. მოთამაშის საქმეა, როგორ მოიქცევა. დარწმუნებული ვარ, ყოველთვის ვიპოვით გამოსავალს. მომავალ სეზონში გამგზავრებები სპორტული თვალსაზრისით მნიშვნელოვანი არ იქნება, რადგან საქართველო, როგორც ევრობასკეტის მასპინძელი ქვეყანა, ფინალურ ტურში საგზურს ფლობს, მსოფლიო რეიტინგისთვის იბრძვის და ახალ მოთამაშეებს ცდის. უფრო მნიშვნელოვანი 2021-22 წლების სეზონი იქნება, როცა მსოფლიო ჩემპიონატისთვის შესარჩევი მატჩები დაიწყება", — აღნიშნა ვატუნინმა.

მისივე თქმით, კონტრაქტის ხელმოწერის დროს მოთამაშეები ნაკრების თამაშებზე გამგზავრებას მნიშვნელოვან პირობად არ აღნიშნავენ და შენგელიასთან ასეთ შემთხვევას პირველად წააწყდნენ. როგორც ვატუნინი ამბობს, ხშირად ნაკრებისა და კლუბის თამაშებს შორის სხვაობა ერთი დღეა და სპორტმენისთვის ამის შეთავსება რთულია.

"კლუბები, ზოგადად, მოთამაშეებს სერიოზულ პრობლემებს არ უქმნიან. როცა კალათბურთელი ან ეროვნული ფედერაციის მხრიდან თხოვნა არსებობს, ყოველთვის არის მოლაპარაკებების საშუალება. აქ უნდა გავითვალისწინოთ სხვა რამ: მოცემული გრაფიკის დროს კალათბურთელებისთვის ამის შეთავსება ფიზიკურად რთულია. ხშირად კლუბისა და ნაკრების თამაშებს შორის სხვაობა ერთი დღეა და ამ დროში ქვეყნიდან ქვეყანაში უნდა გადახვიდე, აღდგე და მოემზადო. ამაზე ყველა არ დათანხმდება. ამიტომაც არ მიმაჩნია, რომ თოკოს შემთხვევა სერიოზული პრეცედენტი იქნება, რომელიც "სისტემას გატეხს", — განაცხადა ცსკა-ს პრეზიდენტმა.

საქართველოს ეროვნული ნაკრების კაპიტანმა, თორნიკე შენგელიამ მოსკოვის ცსკა-სთან სამწლიანი კონტრაქტი გააფორმა. "გელოდებით მოსკოვში", — წერია ქართულად და ინგლისურად ვიდეოზე, რომელშიც ამ ფაქტის აღსანიშნად კლუბმა გაავრცელა.

თავის მხრივ, ეროვნული ნაკრების კაპიტანმა განაცხადა, რომ რუსული არმიის კლუბში გადასვლასთან დაკავშირებით თავი სამართლებელი არავის აქვს.

"ჩემი გარემოება არ განსაზღვრავს ვინ ვარ მე. მე ვარ თორნიკე შენგელია, საქართველოს სულის მატარებელი ესპანეთშიც, ამერიკაშიც, რუსეთშიც, სადაც არ უნდა ვიყო. ამ გადაწყვეტილების მიღებით არცერთი წამით არ შეცვლილა ჩემი დამოკიდებულება ჩემი ხალხის მიმართ, ჩემი სამშობლოს მიმართ და იმედია, რომ არც ხალხის დამოკიდებულება შეიცვლება ჩემს მიმართ", — აღნიშნა შენგელიამ რუსთავი 2-თან.

გადასვლის ერთ-ერთ მიზეზად შენგელია იმასაც ასახელებდა, რომ ნაკრებში თამაშის შესაძლებლობა ექნებოდა.

ამ თემას გამოეხმაურა საქართველოს პრეზიდენტიც და შენგელიას გადაწყვეტილებას მიუღებელი და სამწუხარო უწოდა.

თორნიკე შენგელიას გადასვლაზე ინფორმაცია რამდენიმე თვის განმავლობაში ვრცელდებოდა. 7 ივლისს ამ საკითხს შენგელიაც გამოეხმაურა და განაცხადა, რომ გადაწყვეტილება ჯერ მიღებული არ ჰქონდა. მისი თქმით, ამ გუნდში წასვლით ან არ წასვლით საქართველოს მიმართ დამოკიდებულება არ იცვლება.

წაიკითხეთ:

გაიგეთ მეტი: