კორონავირუსის გავრცელების გამო მთელ მსოფლიოში, მათ შორის ამერიკის შეერთებულ შტატებშიც, ათასობით კინოთეატრი დროებით დაიხურა. იმასთან ერთად, რომ ამის გამო კინოინდუსტრიას დიდი ზიანი მიადგა და მრავალი ფილმის პრემიერა გაურკვეველი ვადით გადაიდო, ცნობილი რეჟისორის, კრისტოფერ ნოლანის თქმით, ამით განსაკუთრებულად რიგითი ადამიანები დაზარალდნენ.

20 მარტს Interstellar-ისა და Inception-ის შემოქმედმა The Washington Post-ში ოპ-ედი გამოაქვეყნა და დღეს არსებულ გამოწვევებზე ისაუბრა:

"როცა ადამიანები ფილმებზე ფიქრობენ, პირველად ვარსკვლავები, კინოსტუდიები და გლამური ახსენდებათ, მაგრამ კინოინდუსტრია კიდევ ბევრ ვინმეს მოიცავს: ისინი, ვინც სალაროებთან დგანან, აღჭურვილობის გამართულობაზე ზრუნავენ, კინოთეატრში ბილეთებს ამოწმებენ, ფილმებს ჯავშნიან და კინოთეატრების ტუალეტებს წმენდენ . ჩვეულებრივი ადამიანები, რომლებსაც სრული ხელფასის ნაცვლად საათობრივი ანაზღაურება აქვთ, ჩვენი საყვარელი გასართობი ადგილების გამართულად ფუნქციონირებაში გამოიმუშავებენ საარსებო შემოსავალს".

კრისტოფერ ნოლანის თქმით, კინოთეატრებს ჩვენს ყოველდღიურობაში გაცილებით დიდი მნიშვნელობა აქვს, ვიდრე ეს წარმოგვიდგენია:

"ჩემი, როგორც რეჟისორის, შემოქმედება არასდროს იქნებოდა სრულქმნილი, რომ არა კინოთეატრის თანამშრომლები და მაყურებლები, რომლებმაც ჩემი ფილმები მიიღეს. ბოლო კვირების განმავლობაში გავიგეთ, რომ ცხოვრებაში კინოში სიარულზე მნიშვნელოვანი რაღაცებიც არსებობს, თუმცა, როცა გააცნობიერებთ, თუ რას უზრუნველყოფს კინოთეატრი ჩვენს ცხოვრებში, მაშინ მიხვდებით, რომ მასზე უკეთესი რამ იმაზე ცოტაა, ვიდრე გეგონათ".

ცნობილმა რეჟისორმა ყველას მოუწოდა, რომ პანდემიის ჩავლის შემდეგ ყველა ერთობლივი ძალებით დაეხმაროს კინოთეატრებს ჩვეულ რიტმში დაბრუნებაში:

"როცა კრიზისი ჩაივლის, კოლექტიური თავშეყრის, კვლავ სიცოცხლის შეგრძნების, ერთად სიყვარულის, სიცილისა და ტირილის საჭიროებას იმაზე უფრო მეტად შევიგრძნობთ, ვიდრე ოდესმე. ჩვენ ვალდებულები არ ვართ, რომ ამერიკულ კინოინდუსტრიას 150 000 თანამშრომლის შენარჩუენაბში დავეხმაროთ, ეს უბრალოდ საკუთარი თავისთვის გვჭირდება, რათა კვლავ შევძლოთ კინოთი ტკბობა".

როგორც უკვე იცით, კორონავირუსის გავრცელების პრევენციის გამო ფილმის ჩვენებები დროებით ქართულ კინოთეატრებშიც შეწყდა. ჯერჯერობით უცნობია, თუ როდის განახლდება კინოთეატრებში ფილმის ჩვენებები. როგორც აცხადებენ, ეს მთლიანად ქვეყანაში შექმნილ სამომავლო მდგომარეობაზე იქნება დამოკიდებული.