იტალიის სენატში დოკუმენტური ფილმის — "დავიწყებული მსხვერპლი: ბუჩამდე იყო აფხაზეთი" — ჩვენება და დისკუსია გაიმართა. ღონისძიება აფხაზეთში რუსეთის მიერ ქართველების წინააღმდეგ ჩადენილი დანაშაულების გენოციდად აღიარების კამპანიის ფარგლებში ჩატარდა.

ღონისძიება ფილმის ერთსაათიანი ჩვენებით დაიწყო, რის შემდეგაც დისკუსია გაიმართა. ფილმი საარქივო მტკიცებულებებსა და აფხაზეთში რუსეთის მიერ ჩადენილი დანაშაულების მსხვერპლთა ისტორიებს აერთიანებს.

დისკუსიაში მონაწილეობდნენ იტალიის მმართველი და ოპოზიციური პარტიების წარმომადგენლები: Azione-ს სენატორი მარკო ლომბარდო, მმართველი Fratelli d’Italia-ს დეპუტატი და პარტიის პროგრამის დეპარტამენტის ხელმძღვანელი ფრანჩესკო ფილინი და დემოკრატიული პარტიის სენატორი ფილიპო სენსი. სპიკერებს შორის იყვნენ აღმოსავლეთ ევროპის, სამხრეთ კავკასიისა და ცენტრალური აზიის საკითხებზე მომუშავე ჟურნალისტი და ანალიტიკოსი ჯაკომო ფერარა და პარტია ფედერალისტების თავმჯდომარე გიგა ბოკერია. დისკუსიას Il Foglio-ს ჟურნალისტი და ავტორი მიკოლ ფლამინი უძღვებოდა.

რუსეთის მიერ ქართველების წინააღმდეგ ჩადენილი დანაშაულების გენოციდად აღიარების კამპანია 2022 წელს დაიწყო. მას შემდეგ გამოფენები და ფილმის სხვადასხვა ვერსიის ჩვენებები საქართველოს არაერთ ქალაქში, აშშ-ის კონგრესში, საფრანგეთის ეროვნულ ასამბლეასა და სხვა დასავლურ ინსტიტუტებში გაიმართა.

კამპანიის მიზანია აფხაზეთში ქართველების წინააღმდეგ ჩადენილი დანაშაულების გენოციდად აღიარება როგორც საქართველოს სახელმწიფოს, ისე საერთაშორისო თანამეგობრობის მიერ.

იტალიის საკანონმდებლო ორგანოს ზედა პალატაში ფილმის ჩვენება და დისკუსია იტალიელი სენატორის, მარკო ლომბარდოს ინიციატივით, ფედერალისტების, "აფხაზთა კრების", "თავისუფლების ინსტიტუტისა" და "ტაბულას" ორგანიზებით ჩატარდა.