კინომანები წელს დაგეგმილ პრემიერებს შორის განსაკუთრებულად ელოდნენ გამორჩეული თანამედროვე ამერიკელი რეჟისორის, უეს ანდერსონის ახალი ფილმის — French Dispatch-ის გამოსვლას, რომლის პრემიერაც 24 ივლისს უნდა შემდგარიყო, თუმცა მსოფლიო პანდემიის გამო ეს თარიღი ცოტა ხნის წინ შეიცვალა.

მთელ მსოფლიოში კორონავირუსის გავრცელებამ ბიზნესის სხვა მრავალ სექტორთან ერთად კინოინდუსტრიაც გამორჩეულად დააზარალა: უამრავი პროექტის წარმოება შეწყდა, კინოთეატრებში დაგეგმილი პრემიერები კი გაურკვეველი ვადით გადაიდო.

მათ შორის მოხვდა უეს ანდერსონის მეათე ფილმიც French Dispatch, რომლის პრემიერა აქამდე 24 ივლისს იყო დაგეგმილი, თუმცა სულ ცოტა ხნის წინ გახდა ცნობილი, რომ ფილმი კინოთეატრებში შემოდგომაზე, 16 ოქტომბერს გამოვა.

მაყურებლების ნაწილი ასევე იმედოვნებდა, რომ ეს კინოსურათი კანის წლევანდელი ფესტივალის საკონკურსო პროგრამაშიც მოხვდებოდა, თუმც, როგორც უკვე ვიცით, კინოფესტივალი გაურკვეველი დროით ასევე გადაიდო.

უეს ანდერსონის ახალი ფილმი კომედიური დრამაა, რომელიც მეოცე საუკუნეში საფრანგეთის გამოგონილ ქალაქში ვითარდება. ამ ახალ გახმაურებულ კინოპროექტში ჰოლივუდის ისეთი ვარსკვლავები თამაშობენ, როგორებიც არიან ფრენსის მაკდორმანდი, ბილ მიურეი, ტიმოთი შალამე, ტილდა სუინტონი, სირშა რონანი, ედრიენ ბროდი, ელიზაბეტ მოსი, ჯეფრი ვრაიტი და უილემ დეფო.

French Dispatch-ის ტრეილერისა და სურათების ნახვა შეგიძლიათ აქ.