საქართველოს სახალხო დამცველს ლევან იოსელიანს გასულ წელს, ხელფასის სახით ჯამში 126 774,72 ლარი აქვს აღებული. ომბუდსმენმა ქონებრივი დეკლარაცია მიმდინარე წლის თებერვალში შეავსო.

ლევან იოსელიანი დეკლარაციაში ორ ქონებას უთითებს: ბინას თბილისში (201,25 კვ.მ), რომელიც 2022 წელს 126 000 აშშ დოლარად აქვს ნაყიდი და მეუღლის სახელზე მიწის ნაკვეთს კიკეთში (1399 კვ.მ), რომელიც 2020 წელს 62 000 აშშ დოლარად აქვთ ნაყიდი.

გარდა ამისა, იოსელიანს Toyota RAV-ის მანქანა აქვს მითითებული დეკლარაციაში, რომელიც 2015 წელს 20 000 აშშ დოლარად შეიძინა.

ომბუდსმენს, დეკლარაციის თანახმად, არც საჩუქრები აქვს მიღებული, არც ნაღდ ფულს ინახავს, მას არც სამეწარმეო საქმიანობა უფიქსირდება და არც 3000 ლარზე მეტი შემოსავალი ან 5000 ლარზე მეტი გასავალი არ აქვს.

დეკლარაციის შევსებისას ლევან იოსელიანს ანგარიშზე 1 116,2 ლარი, 2 786 დოლარი და 90,43 ევრო ჰქონდა. მის მეუღლეს - თეა ნასარიძეს კი 53 956,43 ლარი, 2 786,01 დოლარი და 2,3 ევრო.

სახალხო დამცველს დეკლარაციაში მითითებული ჰყავს მეუღლე, რომელიც გასულ წელს რამდენიმე კომპანიაში მუშაობდა იურისტად: შპს CBD Development-ში, სადაც 154 494,32 ლარის ხელფასი აქვს აღებული, BD Propert-ში, სადაც 24 847,66 ლარი აქვს მიღებული და შპს "ენტოში”, სადაც 71 785,7 ლარის ხელფასი აიღო.

ცნობისთვის, ლევან იოსელიანი მე-10 მოწვევის პარლამენტის წევრი იყო. 2023 წლის 7 მარტს კი საქართველოს სახალხო დამცველად აირჩიეს.