2020 წელს დაგეგმილ კინოპრემიერებს შორის ცნობილი ამერიკელი რეჟისორის, უეს ანდერსონის მეათე ფილმი ერთ-ერთია, რომელსაც კინომანები განსაკუთრებულად ელოდებიან.

The French Dispatch — ასე ჰქვია მის ახალ ფილმს, რომელიც მეოცე საუკუნეში, საფრანგეთის ერთ-ერთ გამოგონილ ქალაქში ვითარდება და ამერიკული გაზეთის ჟურნალისტის შესახებ მოგვითხრობს. ფილმის ტრეილერი სულ ცოტა ხნის წინ გავრცელდა:

რეჟისორმა ბოლო სრულმეტრაჟიანი ფილმი 2014 წელს გადაიღო — The Grand Budapest Hotel, რომელმაც ოსკარის ცხრა ნომინაცია დაიმსახურა. 2018 წელს კი ანიმაციური ფილმი Isle of Dogs შექმნა.

ახალი ფილმის სამსახიობო გუნდი ერთმანეთზე უფრო შთამბეჭდავი მსახიობებისგან შედგება, რომელთა ნაწილი მანამდე რეჟისორის ადრინდელ ფილმებშიც გვინახავს: ფრენსის მაკდორმანდი, ბილ მიურეი, ტიმოთი შალამე, ტილდა სუინტონი, სირშა რონანი, კრისტოფ ვალცი, ედრიენ ბროდი, ელიზაბეტ მოსი, ჯეფრი ვრაიტი, უილემ დეფო, ოუენ უილსონი, ლეა სედუ და ბენისიო დელ ტორო.

ტრეილერიდან ვიგებთ, რომ ფილმის სიუჟეტი სხვადასხვა ადგილსა და დროში განვითარებულ მოვლენებზე მოგვითხრობს. რაც შეეხება გადაღების სტილს, რეჟისორი ამჯერადაც მისთვის დამახასიათებელი ესთეტიკითა და იდეალური სიმეტრიით გააცოცხლებს ერთდროულად სევდიან, კომიკურ და აბსურდულ ისტორიებს ეკრანებზე.

ფოტო: Searchlight

ფოტო: Searchlight

ფოტო: Searchlight

ფოტო: Searchlight

ფოტო: Searchlight

ფილმის პრემიერა, სავარაუდოდ, კანის 73-ე კინოფესტივალზე შედგება. კინოთეატრებში მის ხილვას კი 24 ივლისიდან შევძლებთ.