მაკო არაბული სოციალურ ქსელში წერს, რომ 11 წლის განმავლობაში საჯარო სამსახურში მუშაობდა, მათ შორის 7 წელი სახალხო დამცველის აპარატში, საიდანაც რეორგანიზაციის მიზეზით გაათავისუფლეს.

არაბული მიიჩნევს, რომ ბოლო წლებში საჯარო სამსახურში მოხელე ხალხისა და კონსტიტუციის ნაცვლად მმართველი პარტიისა და ხელმძღვანელის წინაშე გახდა ანგარიშვალდებული და ამბობს, რომ სახალხო დამცველის აპარატშიც ეს მიდგომა დამკვიდრდა.

"11 წელი საჯარო სამსახურში, აქედან 7 წელი — სახალხო დამცველის აპარატში ვიმუშავე, საიდანაც რეორგანიზაციის საბაბით სამსახურიდან გავთავისუფლდი.

ამ წლებმა მომცა უდიდესი გამოცდილება და შესაძლებლობა მემუშავა ისეთ მწვავე პრობლემებზე, როგორიც არის მაგალითად, ფსიქიატრიული დაწესებულებების პაციენტების, უსახლკარო პირების, პატიმრების, სოციალურად დაუცველების, ძალადობის მსხვერპლი ქალების, შშმ პირების, დევნილების, ორსული ქალების უფლებრივი მდგომარეობა, სასამართლო სისტემის პრობლემები, შეკრებისა და გამოხატვის თავისუფლების შემზღუდველ კანონმდებლობა და სხვა.

არსებული სასამართლო სისტემის პირობებშიც კი, ჩვენმა კონსტიტუციურმა სარჩელებმა არაერთი მნიშვნელოვანი ცვლილება მოიტანა.

მიუხედავად იმისა, რომ საჯარო სამსახურმა ამ 11 წლის განმავლობაში გარკვეული ინსტიტუციური განვითარების ეტაპები გაიარა და ნელ-ნელა ყალიბდებოდა მიდგომა, რომ საჯარო მოხელე ხალხისა და კონსტიტუციის წინაშეა ანგარიშვალდებული, სამწუხაროდ, ბოლო წლებში ეს მცირე მონაპოვარიც ჩამოინგრა. ისევ დავბრუნდით საბჭოთა მენტალიტეტში, რომ საჯარო მოხელე არა ხალხის, არამედ მმართველი პარტიის ან ხელმძღვანელის წინაშეა ანგარიშვალდებული.

განსაკუთრებით სამწუხაროა, რომ სახალხო დამცველის აპარატშიც, ნორმად იქცა ეს მიდგომა.

კიდევ ერთი სამწუხარო ფაქტი ის არის, რომ ქართული ოცნების მიერ მიღებულ რეპრესიულ საკანონმდებლო ცვლილებებს, რომელმაც რეორგანიზაციის საბაბით მოხელეების უკონტროლოდ გათავისუფლება გახადა შესაძლებელი და რომლის არაკონსტიტუციურობაზეც მთელი აპარატი ერთსულოვნად თანხმდებოდა, დღეს სწორედ სახალხო დამცველი აღასრულებს ასე სანიმუშოდ", — წერს არაბული.

მაკო არაბულის სამსახურიდან გათავისუფლებაზე ომბუდსმენს ტელეკომპანია "ფორმულას" ჟურნალისტმა ჰკითხა. იოსელიანმა აღნიშნულ საკითხთან დაკავშირებით განაცხადა, რომ მათ უწყებაში "სტრუქტურული რეორგანიზაცია ჩატარდა და ის სტრუქტურული ერთეული, სადაც რამდენიმე ადამიანი მუშაობდა, გაუქმდა".

"თავად მას ასეთი რამ არ დაუწერია, პოლიტიკური ნიშნით გათავისუფლებაში არ მადანაშაულებს. ჩატარდა სტრუქტურული რეორგანიზაცია და ის სტრუქტურული ერთეული, სადაც რამდენიმე ადამიანი მუშაობდა, გაუქმდა. მარტო მას არ შეხებია ეს, სხვებსაც შეეხო, რა ვიცი, ჩვეულებრივი ამბავია.

... რა თქმა უნდა, ვიცნობ პირადად, ყველა ჩემს თანამშრომელს ვიცნობ, მაგრამ მასთან საერთოდ არანაირი კავშირი არ აქვს რეორგანიზაციას. სტრუქტურული ერთეული გაუქმდა, რამდენიმე ადამიანი ამის გამო განთავისუფლდა", — განაცხადა იოსელიანმა.