თბილისის საქალაქო სასამართლომ პოლიციელს, რომელიც ქალის გაუპატიურებაშია ბრალდებული, პატიმრობა შეუფარდა.

პროკურორის ინფორმაციით, ექსპერტიზით დასტურდება დაზიანებები ქალის სხეულზე. კონსტანტინე ცაცუამ ასევე თქვა, რომ პოლიციელმა ქალი სამსახურებრივ ავტომობილში გააუპატიურა. ბრალდების მხარე ამ ეტაპზე ექპერტიზის პასუხებს ელოდება.

ადვოკატის თქმით, ზაზა ალავერდაშვილი ბრალს არ აღიარებს. თუმცა, ბონდო ვათიაშვილი აღნიშნავს, რომ დაცვის მხარე აღკვეთის ღონისძიების სააპელაციო სასამართლოში გასაჩივრებას არ აპირებს.

"მიუხედავად იმისა რომ სასაუბრო და სალაპარაკო ბევრი აქვს ბრალდებულს, ამ ეტაპზე დუმილის უფლებას იყენებს, რაც იმას ნიშნავს, რომ ბრალდებული თავს დამნაშავედ არ ცნობს", — ამბობს ბონდო ვათიაშვილი.

რაც შეეხება გავრცელებულ ინფორმაციას იმასთან დაკავშირებით, რომ ბრალდებული პოლიციელი წარსულში შეწყალებულია, ადვოკატი ამბობს, რომ საქმის მასალებში ასეთი მტკიცებულებები ჯერჯერობით არ არის.

ინფორმაცია იმის შესახებ, რომ მოქმედი პოლიციელი გაუპატიურების ბრალდებით დააკავეს, 22 ივლისს გავრცელდა და პროკურატურამაც დაადასტურა. გამოძიება სისხლი სამართლის კოდექსის 137-ე მუხლით მიმდინარეობს, რაც გაუპატიურებას გულისხმობს.