"რატომ არ უნდა მივსულიყავით, გამაგებინეთ? კითხვა ვუბრუნებ იმ ადამიანებს? რა გავაფუჭე ჩემი იქ მისვლით?" — ასე გამოეხმაურა დაავადებათა კონტროლის ცენტრის ხელმძღვანელი ამირან გამყრელიძე კრიტიკას, რომელიც ეხებოდა ქართული ოცნების ღონისძიებაზე მის დასწრებას.

ამირან გამყრელიძე და მისი მოადგილე პაატა იმნაძე ქართული ოცნების მიერ მაჟორიტარობის კანდიდატების წარდგენას დაესწრნენ. ბევრ სხვა სტუმართან ერთად იქ იყვნენ ინფექციური საავადმყოფოს დირექტორი, თენგიზ ცერცვაძე და ექიმი ლევან რატიანი.

გამყრელიძის თქმით, ღონისძიებაზე NCDC-ის ხელმძღვანელის სტატუსით მიიწვიეს.

"პირველად დამოუკიდებელი საქართველოს ისტორიაში, ამ ხელისუფლების დროს ჯანმრთელობა გახდა ქვეყნის პოლიტიკური პრიორიტეტი. ეს იყო ჩემთვის ყოველთვის ოცნება, რომ მთავრობას გაეთვისებინა ის, რომ ადამიანის ჯანმრთელობა და მოსახლეობის განათლება ეს არის ორი მთავარი ბოძი, რომლებზეც უნდა აშენდეს ქვეყნის მომავალი. თუ ჩვენ გვეყოლება განათლებული საზოგადოება და ჯანმრთელი საზოგადოება, მაშინ ცოდნასა და მეცნიერებაზე დამყარებული ეკონომიკა უფრო სწრაფად განვითარდება

დღეს მიკიჟინებენ, რატომ მივედი იქ. მივედი, დიახ, იმიტომ, რომ მომეცა საშუალება ზოგიერთი ჩემი ინიციატივის განხორციელების. თუ დამაცდიან დროს... არა, არ მინდა არანაირი პოლიტიკა", — აღნიშნა გამყრელიძემ გადაცემა ღია სივრცეში.

ღონისძიების შემდეგ პაატა იმნაძემ განაცხადა, რომ მისი დასწრება პოლიტიკურ სიმპატიებზე მიანიშნებდა.