საქართველოს პრეზიდენტის, სალომე ზურაბიშვილის თქმით, უცილებელია, გაიზარდოს ევროკავშირის სადამკვირვებლო მისიის მანდატი, რათა მან ვითარების გაკონტროლება უფრო ეფექტიანად შეძლოს. ამის შესახებ მან ევროკავშირის სადამკვირვებლო მისიის ხელმძღვანელის, ელჩ მარეკ შჩიგელი მიღებისას განაცხადა.

როგორც ზურაბიშვილმა აღნიშნა, სადამკვირვებლო მისიის მანდატის გაზრდა ადმინისტრაციულ ხაზზე მეტ სიმშვიდეს მოიტანს და ხაზის ორივე მხარეს მცხოვრებ მოქალაქეებს შესაძლებლობას მისცემს უფრო ნორმალურ პირობებში იცხოვრონ.

"ჩვენ ყველანი მომსწრე ვართ, რა სიხშირით იტაცებენ ადამიანებს, ვიცით რა მძიმეა ადმინისტრაციულ ხაზს იქით არსებული ჰუმანიტარული მდგომარეობა", — სალომე ზურაბიშვილმა.

შეხვედრისას საუბარი შეეხო ასევე, სამომავლო გეგმებს, ჟენევის მოლაპარაკებებსა და სხვა ფორმატებს, რომელიც გააქტიურებული უნდა იყოს.

"ჩვენ არ უნდა გავჩერდეთ, არ უნდა შევეგუოთ ამ სიტუაციას და ვეძებოთ ყველა საშუალება, რითაც შესაძლებელი იქნება, ამ დაძაბულობის მოხსნა და რათა დავუბრუნდეთ ნორმალურ სიტუაციას და ბოლომდე შესრულდეს 2008 წლის შეთანხმება", — განაცხადა ზურაბიშვილმა.

11 ივლისს კასპში ოკუპანტებმა ზაზა გახელაძე გაიტაცეს, მანამდე კი ცეცხლსასროლი იარაღით დაჭრეს. შერიგებისა და სამოქალაქო თანასწორობის საკითხებში სახელმწიფო მინისტრის მოვალეობის შემსრულებელის, ლია გიგაურის ინფორმაციით, ის ახალგორის საავადმყოფოშია და მის სიცოცხლეს საფრთხე არ ემუქრება.