ეკონომიკის მინისტრის, ნათია თურნავას განცხადებით ფოსტის პრივატიზების საკითხს მთავრობა ალბათ მომავალ წელს დაუბრუნდება, როცა ბიზნესგარემო გაუმჯობესდება. ამის შესახებ მინისტრმა მთავრობის სხდომის დასრულების შემდეგ განაცხადა.

"ჩვენს მიერ მოწვეული იყო აუდიტი, რომელიც გააკეთებდა შეფასებას იმიტომ, რომ მთავარი ამოცანა იყო, იმდაგვარად დაგვეგეგმა პრივატიზება, რომ სოციალური საკითხები ყოფილიყო დაცული. არის სხვადასხვა ადგილას მცხოვრები მოსახლეობა, სოფლად, მთაში და მას ფოსტა აუცილებლად უნდა მოემსახუროს და ეს ინვესტორისთვის ვალდებულება უნდა ყოფილიყო. კოვიდმა გარკვეულწილად შეცვალა ჩვენი გეგმები", — აღნიშნა თურნავამ.

საქართველოს ფოსტის პრივატიზებაზე ჯერ კიდევ 2018 წელს მაშინდელმა ეკონომიკის მინისტრმა, გიორგი ქობულიამ ისაუბრა. როგორც ის ამბობდა, ფოსტის პრივატიზება 2019 წელს იგეგმებოდა.