პაკისტანის დედაქალაქ ისლამაბადის აეროპორტში დაშვებამდე ცოტა ხნით ადრე, პაკისტანის საერთაშორისო ავიახაზების სამგზავრო თვითმფრინავი რადარებიდან გაუჩინარდა.

ადგილობრივი მედიის ცნობით, თვითმფრინავის ბორტზე 50-მდე ადამიანი იმყოფებოდა. გაუჩინარებული ავიალაინერი შიდა რეისს ასრულებდა ჩიტრალიდან ისლამაბადის მიმართულებით და ავიადისპეჩერებთან კონტაქტი დაშვებამდე ცოტა ხნით ადრე დაკარგა.

პაკისტანური მედიასაშუალებები წერენ, რომ არსებობენ თვითმხილველები, რომლებიც შეესწრნენ ავიაკატასტროფას, თუმცა, ოფიციალურად ეს ჯერ დადასტურებული არ არის.

პაკისტანი მსოფლიოს იმ ქვეყნებს შორისაა, სადაც ავიაუსაფრთხოების სერიოზული პრობლემა დგას. 2012 წელს მომხდარ ავიაკატასტროფას, პაკისტანში 127 ადამიანი ემსხვერპლა, 2010 წელს - 152.