ქართული ოცნების დეპუტატის, კობა კობალაძის შვილის, დავით კობალაძის ადვოკატი ამბობს, რომ ბრალდების მხარეს მისი დაცვის ქვეშ მყოფის დასაკავებლად საკმარისი მტკიცებულებები არ აქვს და არ უნდა დაეკავებინათ. მისი თქმით, მისი დავით კობალაძეს ბრალი უკვე წარედგინა.

"დავით კობალაძეს ამ ეტაპისათვის ბრალი წარედგინა. იგი დაკავებულია და ჩემთვის, როგორც ადვოკატისათვის, ძალიან მიკვირს რატომ არის დაკავებული. იგი თვითონვე გამოცხადდა პოლიციის განყოფილებაში თავის ნებაყოფლობით და როდესაც დააკავეს, საფუძვლად მითითებულია, რომ ის შეიძლება მიიმალოს. ამ მტკიცებულებით, რომელიც მე გადმომეცა და იმ ბრალდებით, რომელიც მას აქვს წარდგენილი, მიმაჩნია, რომ ეს ადამიანი დაკავებული არ უნდა იყოს", — განაცხადა ირაკლი გაბრიჭიძემ TV პირველთან.

დავით კობალაძის დავაკებასთან და ბრალის წარდგენასთან დაკავშირებით შინაგან საქმეთა სამინისტრო ინფორმაციას ამ დრომდე არ ავრცელებს. იმის გასარკვევად, თუ რა მუხლით აქვს ბრალი წარდგენილი კობალაძეს, On.ge უწყებას დაუკავშირდა, სადაც საქმესთან დაკავშირებით 2 დღის წინ გავრეცელებულ განცხადებაზე მიგვითითეს.

შსს განცხადებაში ამბობს, რომ ერთი დაკავებულის წინააღმდეგ გამოძიება ჯანმრთელობის განზრახ მძიმე დაზიანების მუხლით მიმდინარეობს, მეორე დაკავებულის წინააღმდეგ კი — ძალადობისა და ცივი იარაღის ტარებისთვის. რაც შეეხება "ოცნების" დეპუტატის შვილს, მის შესახებ უწყება მხოლოდ იმას ამბობს, რომ "განყოფილებაში პირადი ინიციატივით გამოცხადდა". შსს არ აკონკრეტებს, ედავებიან თუ არა მას რომელიმე დანაშაულს მას.

თავდაპირველად ინფორმაცია ტელეკომპანია პირველმა გაავრცელა, რომ ქართული ოცნების დეპუტატ კობა კობალაძის შვილი და კიდევ რამდენიმე პირი ქუჩაში ადამიანს თავს დაესხნენ და სცემეს, რის შედეგადაც ის საავადმყოფოში აღმოჩნდა.

ჟურნალისტი დაზარალებულის მამის ფარულ ინტერვიუზე დაყრდნობით ამბობს, რომ ბიჭს დაზიანებები თავშიც აქვს მიყენებული.

სიუჟეტის ეთერში გასვლამდე გადაცემის წამყვანმა, ნოდარ მელაძემ თქვა, რომ მას დაზარალებულის მამა დაუკავშირდა და სთხოვა, მასალა არ გასულიყო და ეს მას შემდეგ მოხდა, რაც ჟურნალისტმა კითხვებით დეპუტატ კობალაძესაც მიმართა.

TV პირველის ინფორმაციით, შემთხვევა 24 ივნისს, საბურთალოზე მოხდა და გამოძიება დაწყებული არ იყო.

გადაცემის ანონის გასვლის შემდეგ განცხადება გაავრცელა შინაგან საქმეთა სამინისტრომ, სადაც უწყება ამტკიცებს, რომ 23 წლის ბიჭის ჯანმრთელობის დაზიანების ფაქტზე გამოძიება იმავე დღეს, ვაკე-საბურთალოს მთავარი სამმართველოს პოლიციის მე-7 სამმართველოში დაიწყო.

გარდა ამისა, შსს-ს თქმით, ანონსის გავრცელების შემდეგ "საქმეში გამავალი პირების მიმალვის" საფრთხე შეიქმნა, რადგან დანაშაულის შესახებ პირდაპირ ეთერში გაჟღერდა. უწყება ამბობს, რომ ამის გამო ამ პირების დაკავების გადაწყვეტილება მიიღეს და ორი ადამიანი დააკავეს, კობა კობალაძის შვილი კი თავად მივიდა განყოფილებაში. ყველა მათგანი სრულწლოვანია.