აშშ-ში, ვირჯინიის შტატის სკოლებში ჰარპერ ლის "ნუ მოკლავ ჯაფარას" და მარკ ტვენის "ჰეკლბერი ფინის თავგადასავალი" აკრძალეს - მიზეზი ერთ-ერთი მოსწავლის მშობლის საჩივარი გახდა, რომელიც ამ რომანებში არსებულ რასისტულ გამონათქვამებს აპროტესტებდა, კერძოდ კი ჩიოდა, რომ წიგნში ხშირად იყო ნახსენები აფროამერიკელებისთვის შეურაცხმყოველი სიტყვა "ზანგი" (N-Word), რომელიც ერთ დროს ჩვეულებრივად გამოიყენებოდა მხატვრულ ლიტერატურაში.

როგორც ცნობილია, ჰარპერ ლისა და მარკ ტვენის წიგნები ვირჯინიის შტატის აკომაკის საგრაფოს სკოლების საკლასო ოთახებიდან და ბიბლიოთეკებიდან უკვე გაიტანეს.

გადაწყვეტილება მას შემდეგ მიიღეს, რაც ერთ-ერთმა მშობელმა, მარი როტსეინ უილიამსმა, რომელიც შერეული რასის ბავშვის მშობელია, სკოლის ადმინისტრაციის სხდომაზე განაცხადა: "არ ვკამათობ იმაზე, რომ ეს დიდებული ნაწარმოებებია, თუმცა მათში ძალიან ბევრი რასისტული გამონათქვამია და ხშირად გამოყენებულია შეურაცხმყოფელი ლექსიკა, რომელსაც შეუძლებელია გვერდი აუარო. რას ვასწავლით ჩვენს შვილებს? ჩვენ მათ ვეუბნებით, რომ ეს შეურაცხმყოფელი სიტყვები მისაღებია? ეს არ არის მისაღები. ჩვენ დავკარგავთ შვილებს, თუ გავაგრძელებთ მათთვის იმის თქმას, რომ ეს ნორმაა." - ამბობს მარი როტსეინ უილიამსი.

აკომაკის საგრაფოს სკოლებში სულ 5 000 მოსწავლე სწავლობს და მათი 37% აფროამერიკელია.

ამერიკის ბიბლიოთეკების ასოციაციაში კი ამბობენ, რომ ჰარპერ ლისა და მარკ ტვენის წიგნების ამოღება სასკოლო პროგრამიდან სხვა არაფერია, თუ არა ცენზურა.