უნგრეთის საგარეო საქმეთა მინისტრმა, პიტერ სიიარტომ განაცხადა, რომ დაბალბიუჯეტურმა უნგრულმა კომპანია Wizz Air-მა ოპერაციები და ფრენები არამხოლოდ საქართველოში, არამედ მთელს მსოფლიოში შეამცირა. მისი თქმით, უნგრეთის მთავრობა ყოველთვის ხელს უწყობდა კომპანიის ოპერირებას საქართველოში და ის იმედს გამოთქვამს, რომ Wizz Air მალე იპოვის თავის ადგილს მსოფლიოში.

"ამ პანდემიის პირობებში ძალიან შემცირდა Wizz Air-ის ფრენები, მაგრამ ეს არ არის მხოლოდ საქართველოზე ან უნგრეთზე გავრცელებული სპეციფიკა. Wizz Air-მა არამხოლოდ საქართველოში, არამედ სხვადასხვა ქვეყანაში შეამცირა ოპერაციები და ფრენები.

უნგრეთის მთავრობა ყოველთვის პოზიტიურად უდგებოდა Wizz Air-ის ქმედებებს საქართველოს ტერიტორიაზე და ხელს უწყობდა მის მუშაობას. მე ძალიან დიდი იმედი მაქვს, უბრალოდ, დროის საკითხია და აუცილებლად Wizz Air იპოვის თავის ადგილს მსოფლიოში", — განაცხადა სიიარტომ. (მთავრობის თარგმანი)

ამ თემაზე ისაუბრა საგარეო საქმეთა მინისტრმა, დავით ზალკალიანმაც. მისი თქმით, არაერთი სპეკულაცია გავრცელდა იმაზე, რომ კომპანია საქართველოდან გადის, რაც სიმართლეს არ შეესაბამება და Wizz Air საქართველოში რჩება.

"ჩვენთან არის Wizz Air, როემლიც არის ერთ-ერთი მნიშვნელოვანი უნგრული კომპანია საქართველოში. ის აგრძელებს საქართველოში ყოფნას. ის არის და იქნება საქართველოში და გააგრძელებს ამ კავშირების გაღრმავებას, როგორც უნგრეთთან, ისე ევროპასთან საქართველოს მოქალაქეების წვდომის თვალსაზრისით", — განაცხადა ზალკალიანმა სიტყვით გამოსვლისას.

ზალკალიანმა მადლობა გადაუხადა უნგრელ კოლეგას პანდემიის დროს მხარდაჭერისთვის. ეს არის პირველი მაღალი დონის ვიზიტი ქვეყანაში პანდემიის დაწყების შემდეგ.

Wizz Air-ის კორპორატიული კომუნიკაციების მენეჯერის, ანდრაშ რადოს ინფორმაციით, ქუთაისის აეროპორტის ბაზაზე დროებით ჩერდება ოპერირება და არ იხურება.

"ჩვენ არ ვხურავთ ბაზას, ჩვენ არ გვაქ რაიმე გეგმა ამასთან დაკავშირებით, სამწუხაროდ, ვაჩერებთ ბაზის ოპერაციებს, თვითმფრინავები სხვა ბაზაზე გადავიყვანეთ".

ონლაინ პრესკონფერენციაზე მან განმარტა, რომ საქართველოში დასაქმებულების გათავისუფლება არ იგეგმება და მათთვის გამოსავლის პოვნას ცდილობენ.

"ჩვენ ქუთაისის ბაზის თანამშრომლებს ვთავაზობთ საზღვარგარეთ, ვიზეარის სხვა ბაზაზე მუშაობას მანამ, სანამ განვაახლებთ ოპერირებას. არავის გათავისუფლებას არ ვაპირებთ", — თქვა მან.

ამასთან, Wizz Air-მა ამ თემაზე განმარტებითი განცხადებაც გაავრცელა, სადაც წერს, რომ მზადაა ეპისდიტუაციიდან გამომდინარე აღადგინოს ფრენები ქუთაისის საერთაშორისო აეროპორტიდან და შემდეგ დაამატოს კიდევ ახალი მიმართულებები.