ამბროლაურში რაჭა-ლეჩხუმ-ქვემო სვანეთის ყოფილმა გუბერნატორმა და ნაციონალური მოძრაობის პოლიტიკური საბჭოს წევრმა, ოთარ სირაძემ ახალგაზრდა მწვანეების აქტივისტს, ნიკოლოზ ბაქრაძეს სცემა. დაპირისპირება დღეს, 4 ივლისს ონის ჰესების კასკადის წინააღმდეგ გამართული აქციის შემდეგ მოხდა.

ვიდეოში, რომელიც ინციდენტის შემსწრემ და ერთ-ერთმა აქტივისტმა მარიამ ვაცაძემ გადაიღო, ჩანს, რომ სიტყვიერი შელაპარაკების შემდეგ ოთარ სირაძე აქტივისტ ნიკოლოზ ბაქრაძის ცემას იწყებს. მარიამ ვაცაძე ვიდეოს ფეისბუქზე ავრცელებს, სადაც შემთხვევასაც აღწერს:

"დღეს, მწვანეები ვიყავით ონში ჰესების საწინააღმდეგო აქციაზე. ამ აქციაზე ასევე იყოფებოდა 2005-2008 წლებში რაჭა-ლეჩხუმის გუბერნატორი, ოთარ სირაძე. აქციაზე ახალგაზრდა მწვანეებმა გავაპროტესტეთ პარტიების აქციაზე გამოჩენა. როდესაც სახლში მივდიოდით, ეს ადამიანი და მისი ძმა მანქანით მოგვიახლოვდნენ, გვლანძღავდნენ და გვაგინებდნენ. მალევე გადმოვიდნენ მანქანიდან და ნიკოლოზ ბაქრაძეს თავს დაესხნენ, რაც ამ ვიდეოშიც ჩანს. თავდასხმა გაგრძელდა ვიდეოს მიღმაც. იურისტებს და ჟურნალისტებს დავუკავშირდით უკვე. ნიკოლოზი ახლა კარგადაა".

კიდევ ერთი ვიდეოკადრები მეორე აქტივისტმა, ნათია აროშვილმა გადაიღო და On.ge-ს მიაწოდა. ამ კადრებში ჩანს, რომ დაპირისპირების მონაწილე მეორე პირი აქტივისტ ნიკოლოზ ბაქრაძეს აკავებს, ენმ-ის წევრი, ოთარ სირაძე კი მუშტებით სცემს.

მარიამ ვაცაძე On.ge-ს უყვება, რომ აქტივისტი ნიკოლოზ ბაქრაძე შსს-ს განყოფილებაში იკითხება. უწყების კომენტარს ამ თემაზე მიღებისთანავე შემოგთავაზებთ. ვაცაძის თქმითვე, აქტივისტს ყელის არეში აქვს მცირე დაზიანებები.

ფოტო: მარიამ ვაცაძე