პრემიერმინისტრი გიორგი გახარია ეხმაურება საერთაშორისო გამჭვირვალობა — საქართველოს განცხადებას, რომლის მიხედვით, ქართული ოცნების დეპუტატთან დაკავშირებულმა კომპანიებმა ბოლო ორ წელში 6 მილიონ ლარზე მეტი მიიღეს. გახარიას განცხადებით, თუ არსებობს "იოტისოდენა" საფუძველი, მოკვლევა დაიწყება.

"ქვეყანაში არსებობს საგამოძიებო ორგანო, ანტიკორუფციული სამსახური, რომელსაც დარწმუნებული ვარ, რომ შესაბამისი არასამთავრობო ორგანიზაციები თავიანთ კვლევას გადაუგზავნიან. იმდენად ტრანსფარენტული და ღიაა დღეს, განსაკუთრებით წინასაარჩევნო პროცესში ეს მედია სივრცე, რომ არაფერი არ დაიმალება. ყველამ ხომ ყველაფერი ვიცით. შესაბამისად, თუ იქ არსებობს რაიმე იოტისოდენა საფუძველი იმისთვის, რომ აქ მოკვლევა დაიწყოს, რა თქმა უნდა დაიწყება", — თქვა გახარიამ.

საერთაშორისო გამჭვირვალობა — საქართველოს ინფორმაციით, ქართული ოცნების დეპუტატის, ვიქტორ ჯაფარიძისა და მისი შვილის, ოთარ ჯაფარიძის წილობრივ მფლობელობაში არსებული კომპანიების კონტრაქტების ჯამურმა ღირებულებამ ბოლო ორ წელში 6 264 688 ლარი შეადგინა. ამასთან, დეპუტატის ოჯახი და მათთან დაკავშირებული კომპანიების მეწილეები ქართული ოცნების შემომწირველებიც არიან. კიდეც ერთი ხარვეზი, რაც TI-მ აღმოაჩინა, არასრულად შევსებული ქონებრივი დეკლარაციებია.