საუკუნეზე მეტი ხნის წინ, 1916 წლის პირველ ივლისს დაიბადა ოლივია დე ჰევილენდი, რომელიც მალევე მეოცე საუკუნის კინოინდუსტრიის ნამდვილ ვარსკვლავად იქცა, დღეს კი ჰოლივუდის უკვდავ ლეგენდად ითვლება.

გუშინ, პირველ ივლისს ამ ლეგენდარულმა მსახიობმა ასმეოთხე დაბადების დღე აღნიშნა.

მას მაყურებლები განსაკუთრებულად კარგად იცნობენ საკულტო ფილმით ქარწაღებულნი, რომელშიც მელანი ჰამილტონის როლს ასრულებს.

აღსანიშნავია, რომ ოლივია დე ჰევილენდი 1939 წელს გამოსული ამ საკულტო ფილმის ერთადერთი ცოცხალი ვარსკვლავია მსახიობების ძირითადი გუნდიდან.

ოლივია დე ჰევილენდი ლესლი ჰოვარდთან ერთად ფილმში ქარწაღებულნი.

ფოტო: Loew's Inc

ჰევილენდი ამჟამად პარიზში ცხოვრობს. ის ასევე ყველაზე ასაკოვანი ადამიანია, რომელსაც დიდი ბრიტანეთის დედოფალმა საპატიო სამეფო ტიტული მიანიჭა. მას ეს ჯილდო 2017 წელს გადასცეს, როცა მსახიობს 101 წელი შეუსრულდა.

ფოტო: THIBAULT CAMUS/AP

თავისი მრავალწლიანი კარიერის განმავლობაში ოლივია დე ჰევილენდმა არაერთ მნიშვნელოვან კინოპროექტში მიიღო მონაწილეობა, მათ შორის ორჯერ თავისი სამსახობო შესრულებისთვის ოსკარიც დაიმსახურა: 1946 წელს To Each His Own-ში მონაწილეობის შემდეგ ქალის საუკეთესო როლის ნომინაციაში გაიმარჯვა, სამი წლის შემდეგ კი იგივე ჯილდო მიიღო ფილმით The Heiress.

ოლივია დე ჰევილენდი და გრეის კელი. 1955 წელი.

ფოტო: EDWARD QUINN

2017 წელს გამოვიდა რაიან მერფის სერიალი Feud: Bette and Joan, რომელშიც ჰოლივუდის ოქრის ხანის სხვა ცნობილ სახეებთან ერთად ოლივია დე ჰევილენდის პროტოტიპიც იყო წარმოდგენილი, რომელსაც კეტრინ ზეტა-ჯონსი განასახიერებდა.

ამის გამო ჰევილენდმა ტელეკომპანია FX-ს უჩივლა: ის მიიჩნევდა, რომ სერიალში დამამცირებლად წარმოაჩინეს. მსახიობი სასამართლოში დამარცხდა.

კეტრინ ზეტა-ჯონსი ოლივია დე ჰევილენდის როლში სერიალ Feud-ში.

ფოტო: FX

როგორც უკვე იცით, გასულ თვეში სტრიმინგ სერვისმა HBO Max-მა ფილმების კატალოგიდან დროებით ამოიღო ქარწაღებულნი რასისტული კონტექსტის გამო, რამდენიმე დღის შემდეგ კი ფილმი კვლავ დაბრუნდა პლატფორმაზე სწორედ ამ კონტექსტის განხილვასთან და ანალიზთან ერთად.