2019 წელს გამოსულ ფილმებს შორის არი ასტერის საშინელებათა ჟანრის კინოსურათი Midsommar ნამდვილად იყო წლის ერთ-ერთი მთავარი კინომოვლენა, რომელიც სხვადასხვა გავლენიან დაჯილდოებებზე სათანადოდ არ შეიმჩნიეს, თუმცა ჟანრული კინოს გულშემატკივრებმა მაინც განსაკუთრებულად შეიყვარეს ის.

თუ უკვე თქვენც ნახეთ ეს ფილმი, მაშინ არ დაგავიწყდებოდათ მისი გამორჩეულად მომხიბვლელი ატმოსფერო და ესთეტიკა.

ფოტო: A24

Midsommar-ის პრემიერა გასულ ზაფხულს შედგა და ივლისში ამ თარიღიდან ერთი წელი გადის. ფილმის მწარმოებელმა კომპანია A24-მა კი გადაწყვიტა, რომ ამ ფაქტის აღსანიშნავად სპეციალური წიგნი გამოეშვა, რომელიც ფილმში გამოყენებული ნახატებით იქნება გაფორმებული.

ილუსტრაციების ავტორი რაგნარ პერსონია, რომელიც ასევე მუშაობდა ფილმში ნაჩვენები ვიზუალების შექმნაზე: მას თვეები დასჭირდა, რათა სკანდინავიური ფოლკლორი შეესწავლა და ადგილობრივი წარმოდგენების ავთენტური ნახატები შეექმნა.

ფოტო: A24

წიგნი 62-გვერდიანი იქნება და მას თანდართული ექნება რეჟისორ მარტინ სკორსეზეს წინასიტყვაობა.

"რამდენიმე წლის წინ ვუყურე არი ასტერის პირველ ფილმს Hereditary. დასაწყისიდანვე აღფრთოვანებული ვიყავი. ამ ახალგაზრდა ხელოვანს ზუსტად ესმის, თუ რა არის კინო. სიმეტრიის დაცვა, სტრუქტურის აგების სიზუსტე, რიტმის შენარჩუნება და ხმა — ამ ფილმში ყველაფერი ეს ცხადი იყო", — წერს სკორსეზე.

ფოტო: A24

წიგნთან ერთად იყიდება საიუბილეო გამოშვების კომპაქტ დისკი, რომელზეც რეჟისორის მონტაჟით ფილმის უფრო ხანგრძლივი, 171-წუთიანი ვერსიაა ჩაწერილი.

წიგნი და დისკი ერთდროულად $45 ეღირება და მისი შეძენა A24-ის ვებსაიტზეა შესაძლებელი.

ფოტო: A24

ეს პირველი შემთხვევა არ არის, როცა კინოკომპანია A24 ამ ფილმთან დაკავშირებულ ნივთებს ყიდის: რამდენიმე კვირის წინ საქველმოქმედო აუქციონზე Midsommar-დან ცნობილი სარიტუალო სამოსი გაიყიდა.