Breakthrough Prize სამეცნიერო ჯილდოა, რომელიც 2012 წელს გუგლის დამფუძნებელმა სერგეი ბრინმა, მარკ ცუკერბერგმა, იური მილნერმა და ჯეკ მამ მეუღლეებთან ერთად დააარსეს.

ჯილდო სამ კატეგორიაში რამდენიმე მეცნიერზე გაიცემა და საპრიზო ფონდი $25 მილიონია.

წარდგენილი კანდიდატებიდან გამარჯვებულებს სპეციალური საბჭო ირჩევს, რომლის შემადგენლობაშიც ოთხი ადამიანი შედის. იური მილნერი - Mail.ru Group-ის დამფუძნებელი, მარკ ცუკერბერგი - Facebook-ის დამფუძნებელი, ანა ვოიჟისკი - 23andme-ს დამფუძნებელი და ამერიკელი ნეირომეცნიერი კორნელია ბერგმანი.

დაჯილდოების ცერემონია გუშინ გაიმართა, გთავაზობთ გამარჯვებულ მეცნიერებსა და მათ მიღწევებს.

ფოტო: Breakthrough Prize

სიცოცხლის მეცნიერებები ($3 მილიონი თითოეულ გამარჯვებულს):

  • სტივენ ილიჯი - დაჯილდოვდა ნაშრომის გამო, რომლის ფარგლებშიც გამოიკვლია, როგორ ზრდიან დაზიანების აღმომჩენი ცილები მუტირებული დნმ-ს გამრავლების პროცესს და შესაბამისად, ზრდიან კიბოს განვითარების რისკს.
  • ჰარი ნოლერი - აღმოაჩინა, რომ სიცოცხლის წარმოქმნაში ცენტრალური როლი რიბოსომულმა რნმ-მა შეასრულა (რიბონუკლეინის მჟავა).
  • როლანდ ნუსი - კვლევა Wtn გენსა და კიბოს წარმოქმნას შორის არსებულ კავშირზე.
  • იოშინორი ოსუმი - ავტოფაგის აღმოჩენისთვის - ამ პროცესში უჯრედები საკუთარ თავს ამუშავებენ და საკვებს იღებენ. ამავე ნაშრომისთვის იაპონელ მეცნიერს 2016 წლის ნობელის პრემიაც გადასცეს მედიცინის დარგში.
  • ჰუდა იაჰია ზოგბი - სპინოცერებრალური ატაქსიისა და რატტის სინდრომის ბიოლოგიური საფუძვლების აღმოჩენისთვის.

ფუნდამენტური ფიზიკა ($3 მილიონი საერთო საპრიზო ფონდი):

პრიზი გადაეცა სამ მეცნიერს:

  • ჯოზეფ პოლჩინსკის
  • ენდრიუ სტრომინგერს
  • კურმუნ ვაფას.

სიმების თეორიაში, კვანტური ველის თეორიასა და კვანტური გრავიტაციის საკითხებზე მუშაობისას განსაკუთრებული მიღწევებისთვის.

მათემატიკა ($3 მილიონი):

პრიზი გადაეცა ჯინ ბორგეინს მისი განსაკუთრებული წვლილისთვის მაღალი განზომილების გეომეტრიასა და რიცხვების თეორიაში.

Breakthrough-ს გამოწვევა ახალგაზრდებს:

ამ კატეგორიაში ის ახალგაზრდები ჯილდოვდებიან, რომლებიც სამეცნიერო მიღწევების ვიზუალიზაციაზე და ფართო საზოგადოებისთვის გაცნობაზე მუშაობენ. ამ პრიზის მისაღებად თინეჯერებმა უნდა შექმნან ვიდეო, რომელიც კონკრეტულ პროცესს, თეორიას ან სამეცნიერო თემას საინტერესოდ და ინფორმატიულად წარმოაჩენს.

გამარჯვებულებს $250 ათასი გადაეცემათ, დამატებითი ფულადი პრიზი გამოყოფილია გამარჯვებულის მასწავლებლისა და სკოლისთვისაც.

წელს ამ კატეგორიაში ორი გამარჯვებული გამოვლინდა:

დიანა სი - 17 წლის მოსწავლე სინგაპურიდან, ვიდეო ანტიბიოტიკების მიმართ რეზისტენტული ბაქტერიების შესახებ:

ანტონელა მასინი - 18 წლის მოსწავლე პერუდან, ვიდეო კვანტური ფიზიკის შესახებ:

დაჯილდოების ცერემონიალი National Geographic-ზე გადაიცემოდა.