კომპანია მორთული გასული წლის ბოლოს შეიქმნა, ის მომხმარებლებს საქართველოს სხვადასხვა კუთხის ძველი ქართული ორნამენტებით მორთულ წინდებს სთავაზობს. წინდა უძველესი დროიდან ქართული ტრადიციული სამოსის განუყოფელი ნაწილი იყო, მატყლისგან იქსოვებოდა და ფერადი ორნამენტებით იყო გაფორმებული. სწორედ ამიტომ ბრენდმა გადაწყვიტა თავდაპირველად უნიკალური და მრავალფეროვანი ქართული ორნამენტები მაღალი ხარისხის ბამბის წინდებზე გადმოეტანა, რომელიც შესაძლებელია ყველა სტილის სამოს მოვუხდინოთ და ყოველ დღე ვატაროთ.

ბიზნეს იდეა კომპანიის დამფუძნებელს, თეა რამიშვილს საქართველოს სხვადასხვა კუთხეში ხშირი სტუმრობის დროს გაუჩნდა. მან აღმოაჩინა, თუ როგორ საოცარ ორნამენტებს ქმნიდნენ ჩვენი წინაპრები საუკუნეების განმავლობაში. ისინი საქართველოს ყველა კუთხის უძველესს ხელნაწერებში, ქსოვილებში, მხატვრობაში, ოქრომჭედლობასა და კერამიკაში გვხვდება. ამ ორნამენტებს ის ხშირად უღებდა სურათებს ან აკეთებდა ჩანახატებს და საკუთარ თავს ეკითხებოდა, რატომ ასოცირდება ჩვენი ქვეყანა ძირითადად მხოლოდ ხინკალთან და ღვინოსთან, როდესაც ამდენი სხვა ღირებულებაც გვაქვს. სწორედ მაშინ გაჩნდა მორთული, ბრენდი რომელმაც გადაწყვიტა, ქართული ორნამენტების მოტივები თანამედროვე დიზაინში და ჩვენს ყოველდღიურობაში მისი მხატვრული სილამაზით და სიმდიდრით გადმოეტანა.

"წლები ბანკში ვმუშაობდი და ყოველთვის ვოცნებობდი, ისეთი რამე მეკეთებინა, რაც ხელოვნებასთან და შემოქმედებასთან იქნებოდა დაკავშირებული, რადგან ბავშვობიდან ვხატავდი და ეს სფერო ძალიან მაინტერესებდა. ორი წლის წინ დავიწყე გრაფიკული დიზაინის, ხატვის და ფოტოგრაფიის შესწავლა, მაშინვე დავიწყე ფიქრი ჩემს ბრენდზე. მაგ დროისთვის ორნამენტიკით უკვე ღრმად დავინტერესდი, ვყიდულობდი წიგნებს და ვეძებდი ბიბლიოთეკებში ორნამენტებს. ბრენდის სახელიც აქედან გაჩნდა, სიტყვა მორთულობა თითქოს მაშინვე ორნამენტს გვაგონებს. გასულ წელს, 40 წლის ასაკში ჩავაბარე თბილისის სამხატვრო აკადემიაში, დავანებე თავი ბანკში წარმატებულ სამსახურს და მთლიანად ხელოვნების სფეროში გადმოვერთე", — ყვება თეა რამიშვილი.

ბრენდის უმთავრესი მიზანია, თანამედროვე საზოგადოებაში ქართული ორნამენტების პოპულარიზაცია, როგორც ქვეყნის შიგნით, ასევე მის ფარგლებს გარეთ. "ამით კიდევ ერთხელ გვინდა წარმოვაჩინოთ ჩვენი ქვეყნის უძველესი ისტორია და მისი მდიდარი წარსული", — ამბობს მორთულის დამფუძნებელი.

სტარტაპს ამ მოკლე დროში საკმაოდ ბევრი ერთგული მომხმარებელი გაუჩნდა და უამრავი დადებითი გამოხმაურება აქვს. ქართული ორნამენტების და მათი ისტორიის გაცნობა, როგორც ქართველი ასევე უცხოელი მყიდველისთვის ძალიან საინტერესო აღმოჩნდა, რაც ბრენდის მთავარი მოტივაციაა. მომხმარებლები ხშირად ყიდულობენ სწორედ იმ ორნამენტით მორთულ წინდებს, რომელი კუთხიდანაც არიან წარმოშობით და ეს ძალიან მოსწონთ. "არიან ერთგული მომხმარებლები ვინც თვითონ გვიგზავნიან თავისი კუთხის ორნამენტებს და ძალიან უხარიათ რომ ეს ორნამენტები გადატანილი იყოს ჩვენს პროდუქციაზე, ერთ-ერთი ასეთი მოწოდებული ორნამენტი გადავიტანეთ ჩვენს ახალ პროდუქტზე, მაისურზე. ეს არის აფხაზეთის, კერძოდ ბიჭვინთის XII საუკუნის ულამაზესი ქართული ორნამენტი".

პანდემიის და შექმნილი რთული ვითარების გამო მორთულსაც, როგორც ბევრ სხვა სტარტაპს მოუწია თავისი სტრატეგიის და სამომავლო გეგმების შეცვლა. შეუძლებელი გახდა სტენდების დადგმა და ამიტომ ალტერნატიული გზა იყო პროდუქციის გაყიდვა სხვადასხვა ქართული მარკეტფლეისების (vendoo, shop.entrepreneur, mystartup) მეშვეობით. ასევე რადგან შეჩერებული იყო უმეტესი საწარმო, გართულდა ახალ იდეებზე მუშაობა და მათი შეთავაზება, რადგან ბრენდის ყველა პროდუქცია საქართველოში იწარმოება. გასულ თვეს ბრენდი უკვე აქტიურად ჩაერთო გაყიდვებში და მომხმარებლებს ახალი პროდუქტი - მაისურები შესთავაზა. მაისურებზეც ასევე გადმოტანილია ქართული ისტორიის ის ნაწილი როგორიცაა ორნამენტები. მორთულის პროდუქცია სხვადასხვა გემოვნების ადამიანებს ხიბლავს, ის შეიძლება მოიხდინონ როგორც სპორტული ასევე კლასიკური სტილის მოყვარულებმა.

მორთულის ყველა პროდუქტის დიზაინი მხოლოდ ქართული ორნამენტების მიხედვით არის შექმნილი, რომლებიც დაცულია ქართულ არქივებში და წიგნებში. ბრენდს დიდი სამომავლო გეგმები აქვს და მალე ის მომხმარებელს შესთავაზებს უფრო მეტ და მრავალფეროვან პროდუქციას საქართველოს ყველა კუთხის ორნამენტების უკეთ გასაცნობად.