ბრალდებულ გიორგი რურუას ერთ-ერთი ადვოკატი, დიმიტრი საძაგლიშვილი ამბობს, რომ გიორგი რურუას საქმეზე გავლენას ვერაფერი, მათ შორის, ვერც ომბუდსმენის განცხადება ვერ მოახდენს, თუკი არ შეიცვლება პოლიტიკური ნება. ამაზე მან დღეს, 25 ივნისის სხდომის შემდეგ ჟურნალისტებთან ისაუბრა:

"პოლიტიკური ნების ცვლილებამ საქმეზე და მოსამართლეზე შეიძლება, გავლენა მოახდინოს. წინააღმდეგ შემთხვევაში, არავინ არ მოახდენს გავლენას".

დღევანდელ სხდომაზე დაცვის მხარემ პატიმრობის გირაოთი შეცვლის შუამდგომლობა დააყენა, თუმცა მოსამართლემ ახალი დანაშაულის ჩადენისა და მიმალვის მოტივით, არ დააკმაყოფილა. დიმიტრი საძაგლიშვილის თქმით, მათ არ ჰქონიათ ოპტიმისტური მოლოდინი შუამდგომლობის დაკმაყოფილებაზე:

"არ გვქონდა ოპტიმისტური მოლოდინი ამ შუამდგომლობაზე, არა იმიტომ რომ დასაბუთებული არ გვქონდა, არამედ იმიტომ, რომ სასამართლო არ არის მიუკერძოებელი არბიტრი. ჩვენი პოზიციის დასაბუთებულობით არ იღებს გადაწყვეტილებას მოსამართლე ვალერიან ბუგიანიშვილი".

მომდევნო პროცესი ორშაბათს, 11 საათზეა ჩანიშნული. ადვოკატის თქმით, ჯერ უცნობია და იმსჯელებენ, თუ რითი გაგრძელდება რურუას საქმის სასამართლო განხილვა.