შინაგან საქმეთა სამინისტროს ადამიანის უფლებათა დაცვის დეპარტამენტი არასრულწლოვანთა პორნოგრაფიის ამსახველი ფოტო და ვიდეო მასალის გარკვეულ ინტერნეტ საიტებზე ხელმისაწვდომობის საკითხთან დაკავშირებით განცხადებას ავრცელებს. უწყების განმარტებით, იმ ვებგვერდების დომეინები, რომელზეც დღეს სავარაუდოდ მასალა განთავსებულია, საქართველოში რეგისტრირებული არ არის, რაც აღნიშნული მასალის დაბლოკვის შესაძლებლობას საკმაოდ ართულებს.

მათივე ინფორმაციით, რომ არასრულწლოვანთა გამოსახულების შემცველი პორნოგრაფიული მასალების მომხმარებლები თავადაც ახდენენ მსგავსი შინაარსის ფოტო-ვიდეო მასალის რეალიზაციას და საეჭვო რეპუტაციის მქონე ვებგვერდებზე მათი გავრცელება სწორედ ამან განაპირობა.

"მედიასაშუალებებით გავრცელდა ინფორმაცია, რომ 2019 წელს, შინაგან საქმეთა სამინისტროს მიერ ჩატარებული გამოძიების ფარგლებში მოპოვებული მასალა ხელმისაწვდომია სხვადასხვა ინტერნეტ საიტებზე.


აღნიშნულ საქმეზე მოპოვებული მტკიცებულებებით დადგენილია, რომ საქართველოს ტერიტორიაზე არასრულწლოვანთა გამოსახულების შემცველი პორნოგრაფიული მასალების დამზადება ხორციელდებოდა გარკვეული პერიოდის განმავლობაში, ხოლო მისი შემდგომი რეალიზაცია ხდებოდა ინტერნეტ საშუალებებით, რამაც ხელი შეუწყო დიდი მოცულობის ფოტო-ვიდეო მასალის გავრცელებასა და ბავშვთა პორნოგრაფიის მომხმარებელთა ხელში მოხვედრას", — აცხადებენ უწყებაში.

მათივე განმარტებით, მოცემულ შემთხვევაშიც, მასალა, რომელიც ტელევიზიაში გასულ სიუჟეტში იქნა ნაჩვენები, ატვირთული იქნა უცხოურ საიტზე, რომელიც სავარუდოდ გამოძიების დაწყებამდე ან/და მიმდინარეობის დროს გაიყიდა.

"ცალსახად გვინდა აღვნიშნოთ, რომ აღნიშნული მასალა ხელმისაწვდომი არ გამხდარა სისხლის სამართლის საქმიდან და შესაბამის საიტებზე არ ატვირთულა საქართველოს ტერიტორიაზე. აღნიშნული სირთულეების მიუხედავად, საერთაშორისო საპოლიციო თანამშრომლობის ფარგლებში, მუდმივად ხორციელდება უცხოური სამართალდამცავი ორგანოების ინფორმირება ზემოხსენებულ საკითხებთან დაკავშირებით, რითაც მაქსიმალურად ვცდილობთ მსგავსი ფაქტების აღკვეთასა და პრევენციას", — ნათქვამია უწყების განცხადებაში.

2020 წლის 21 ივნისს, მთავარის არხის გადაცემა PostFactum-ში გავიდა სიუჟეტი ბავშვთა პორნოგრაფიის საქმეზე, სადაც საუბარი იყო, რომ ის პორნოგრაფიული მასალები, რომელიც საქმეში დევს ინტერნეტში კვლავ ხელმისწავდომია.