მთავარი არხის თანამფლობელის, ბრალდებულ გიორგი რურუას პროცესზე დაცვის მხარის მოწმეები, კერძოდ, ის პოლიციელები გამოკითხეს, რომლებიც რურუას საკნიდან დნმ ნიმუშის ამოღებაში მონაწილეობდნენ.

მოწმეები აცხადებენ, რომ რურუას დნმ-სთვის ოქმის შედგენა მოხდა საკანს გარეთ, იმავე შენობის სხვა ოთახში. ერთ-ერთმა მოწმემ თქვა ისიც, რომ იცნობს საპროცესო კოდექსს და იცის, რომ კანონით იმის თანდასწრებით უნდა შეედგინათ ოქმი, ვისგანაც დნმ ამოიღეს. მან განმარტა, რომ ეს ადგილზე შეუძლებელი იყო, თუმცა ასეთ ოქმს ხელი მოაწერეს.

სხვა ოთახში ოქმის შედგენას ისინი იმით ხსნიან, რომ საკანში გიორგი რურუა მათ მიმართ აგრესიული იყო და სხვა საკნებიდან პატიმრები ახმაურდნენ.

დაცვის მხარის, დიმიტრი საძაგლიშვილის თქმით, ამით დასტურდება პოლიციელთა მხრიდან დოკუმენტების გაყალბება. ადვოკატი ამბობს რომ პოლიციელმა ოქმის კანონდარღვევით შედგენა დაადასტურა.

"ზუსტად ასე მოხდა დოკუმენტების გაყალბება 18 ნოემბერსაც, როდესაც არ ჩატარდა ჩხრეკა, უბრალოდ, სადღაც პოლიციის შენობაში გამომძიებელმა შეადგინა ყალბი ჩხრეკის ოქმი და ამ ოქმში დააფიქსიდა, რომ მან აღმოაჩნდა ცეცხლსასროლი იარაღი, ანუს ადა. ჩვენ შევძელით ვუდეომასალის მოპოვება, იქ უტყუარად დადასტურდა დოკუმენტების გაყალბება და გაცილებით უარესად იმოქმედებდნენ იქ, სადაც მათი მეთვალყურეობა არ ხდებოდა", — ამბობს საძაგლიშვილი.

პროცესის დასრულების შემდეგ, პროკურორმა ვასილ სამხარაძემ ჟურნალისტებს განუცხადა, რომ საკანში ჩატარებული ჩხრეკის ოქმი და ამოღებული ნივთები დაცვის მხარის მტკიცებულებაა. მისივე განცხადებით, მოსამართლემ უნდა შეაფასოს რამდენად იყო არსებითი დარღვევა ადგილზე.

"საგამოძიებო მოქმედება მოსამართლის განჩინების საფუძველზე ჩატარდა. ტექნიკური ხასიათის დეტალები: ადგილზე დალუქვა თუ რამდენიმე მეტრის მოშორებით, სასამართლოს შესაფასებელია", — ამბობს ის.

პროცესის დაწყებისას ბრალდებულმა გიორგი რურუამ კიდევ ერთხელ განუცხადა მოსამართლეს, რომ მის მიმართ პოლიტიკური დევნაა და სიმართლეს დაამტკიცებს. მან მოსამართლეს მიმართა, რომ ზეწოლა ხორციელდება მასზეც:

"ბატონო მოსამართლე, მინდა ვისაუბრო იმ ზეწოლაზე, რომელიც ხორციელდება ჩემზე და თქვენზე. მინდა უბრალოდ მაგალითი მოვიყვანო, მსოფლიოში, მადუროს ვენესუელას, ბელარუსის, რუსეთის, სირიის გარდა, პატიმარზე ამდენს სად ლაპარაკობენ მინისტრები, ქალაქის მერი და პარლამენტარები. არის თუ არა ეს პოლიტიკურად დაინტერესებული საქმე და არის თუ არა ეს პოლიტიკურად შეკერილი საქმე?

[...] კიდევ ერთხელ ვაცხადებ, რომ მე არ ვარ დამნაშავე. ჩემ მიმართ არის პოლიტიკური დევნა და ეს აუცილებლად გამომჟღავნდება. მე ჩემს სიმართლეს დავამტკიცებ", — განაცხადა გიორგი რურუამ პროცესზე.

გიორგი რურუას სასამართლო პროცესი ხვალ, 25 ივნისს გაგრძელდება. ადვოკატებია თქმით, ჯერჯერობით არ გადაუწყვეტიათ, დააყენებენ თუ არა გათავისუფლების შუამდგომლობას ხვალინდელ პროცესზე. დიმიტრი საძაგლიშვილის თქმით, ისინი ამისთვის ყველანაირ შესაძლებლობას გამოიყენებენ.