17 აგვისტოს სტრიმინგ სერვისი ნეტფლიქსი The Witcher-ის მეორე სეზონის გადაღებებს დიდ ბრიტანეთში განაახლებს.

ამის შესახებ ინფორმაცია ტვიტერზე სერიალის ოფიციალურ ანგარიშზე გავრცელდა.

ნეტფლიქსს დაგეგმილი ჰქონდა, რომ 2020 წელს მხოლოდ დიდ ბრიტანეთში 50 სატელევიზიო შოუს წარმოებაზე 400 მილიონ გირვანქა სტერლინგს დახარჯავდა. მათ შორის ერთ-ერთი The Witcher იყო, თუმცა კორონავირუსის გავრცელების გამო მარტის დასაწყისში ყველა პროექტზე მუშაობა შეჩერდა.

ჰოლივუდში ერთ-ერთი პირველი მაღალბიუჯეტიანი პროექტი, რომლის გადაღებებიც განახლდა, ავატარია: რეჟისორი ჯეიმს კამერონი შემოქმედებით გუნდთან ერთად უკვე ჩავიდა ახალ ზელანდიაში მუშაობის გასაგრძელებლად. შესაბამისად, უკვე სატელევიზიო ინდუსტრიაშიც ნელ-ნელა იწყებენ დაგეგმილ პროექტებზე მუშაობის განახლებას.

The Witcher, რომელსაც Game of Thrones-ის მსგავს წარმატებას უწინასწარმეტყველებდნენ, 2019 წელს გამოვიდა და ნეტფლიქსის ერთ-ერთი ყველაზე პოპულარული შოუ გახდა: პრემიერიდან 4 კვირის განმავლობაში ფენტეზის ჟანრის ეს სერიალი ნეტფლიქსის 76 მილიონ მომხმარებელზე მეტმა ნახა.

ნეტფლიქსის ამ გახმაურებულ სატელევიზიო შოუში მთავარი გმირის, გერალტის როლს მსახიობი ჰენრი კავილი ასრულებს, რომელსაც მაყურებლები მანამდე სუპერმენის როლით იცნობდნენ. ბოლოდროინდელი ინფორმაციით, შესაძლოა, მალე კავილი კვლავ ვიხილოთ ამ კომიქსის გმირის როლში.

იმის გამო, რომ უცნობია, თუ რამდენ ხანს გაგრძელდება The Witcher-მეორე სეზონის გადაღებები აგვისტოში, არავინ იცის ზუსტად, თუ როდის შეძლებს მაყურებელი მის ხილვას, თუმცა მთავარია, რომ არსებულ პროექტებზე მუშაობის დასრულება მაინც შეძლონ კომპანიებმა, რათა სერიალების მოყვარულებს უახლოეს მომავალში ახალი სანახაობა არ მოაკლდეთ.