აშშ-ს დემოკრატი საპრეზიდენტო კანდიდატის ჯო ბაიდენის საგარეო პოლიტიკის ერთ-ერთი მრჩეველის, მაიკლ კარპენტერის თქმით, რუსეთი საქართველოს ისევ უყურებს, როგორც ვასალ ქვეყანას. მისივე თქმით, კრემლს საქართველოს საზოგადოების მიმართ დამცინავი დამოკიდებულება აქვს, თითქოს ქართველები ქვეყნის ოკუპაციას ვერ ხედავენ. ამის შესახებ კარპენტერმა ამერიკის ხმასთან ინტერვიუში ისაუბრა.

"კრემლი ფიქრობს, რომ საქართველო არ უნდა გაწევრიანდეს ევროატლანტიკურ სტრუქტურებში. კრემლს საქართველოს საზოგადოების მიმართ დამცინავი დამოკიდებულება აქვს ისეთი, თითქოს საქართველო ვერ ხედავს იმას, რომ რუსეთი აგრძელებს ქვეყნის 20 პროცენტის ოკუპაციას. მაგრამ ამ ბოლო ერთი წლის განმავლობაში, ვნახეთ როგორ გამოხატავს ქართველი ხალხი საკუთარ აზრს, რას ფიქრობს რუსეთის ოკუპაციაზე და იმაზე, რომ კრემლი მათ როგორც კოლონიას, ისე უყურებს", — განაცხადა კარპენტერმა.

კარპენტერს არ ჰგონია, რომ კრემლს გასული წლიდან გაკვეთილები ესწავლა.

"რუსეთის მთავრობამ უნდა გააცნობიეროს ის, რომ მათ გარშემო მცხოვრებ ქვეყნებს სურთ იყვნენ დამოუკიდებლები, სუვერენულები და თვითონ მიიღონ საკუთარ მომავალთან დაკავშირებული გადაწყვეტილებები. რაც მალე გააცნობიერებს კრემლი ამას, მით უკეთესი, მაგრამ ვერ ვიტყვი, რომ ამის იმედი მაქვს", — განაცხადა კარპენტერმა.