კორეული პოპის (K-pop) ფანები და TikTok-ის მომხმარებლები ამბობენ, რომ ოკლაჰომას შტატში პრეზიდენტ დონალდ ტრამპის მიტინგზე დასასწრები ადგილები დაიკავეს და შემდეგ არ გამოცხადდნენ, რის გამოც დარბაზში ადგილები ცარიელი იყო. მიტინგი ქალაქ ტალსაში 21 ივნისს ჩატარდა.

პრეზიდენტი დონალდ ტრამპის წინასაარჩევნო კამპანიის ფარგლებში მოსახლეობას მოუწოდებდნენ, 11 ივნისიდან მიტინგზე დასასწრები უფასო ბილეთებისთვის რეგისტრაცია გაევლოთ. როგორც არაერთი ამერიკული გამოცემა წერს, K-pop-ის გულშემატკივრებმა ინფორმაცია სოციალურ ქსელებში გააზიარეს და თავიანთ გამომწერებს მოუწოდეს, ბილეთებისთვის რეგისტრაცია გაევლოთ, შემდეგ კი მიტინგზე არ გამოცხადებულიყვნენ. გეგმამ დიდი პოპულარობა მოიპოვა TikTok-ზე, სადაც მას არაერთი მიმდევარი გაუჩნდა.

დარბაზში, სადაც ამომრჩეველთან ტრამპის შეხვედრა გაიმართა, 19 ათასზე მეტი ადამიანი ეტევა. ტალსას სახანძრო სამსახურში კი ამბობენ, რომ ტრამპთან შეხვედრაზე 6 200-მდე ადამიანი იყო.

დონალდ ტრამპის წინასაარჩევნო კამპანიის ხელმძღვანელი, ბრედ პარსკეილი აცხადებს, რომ მიტინგზე დასასწრები ბილეთის მისაღებად მილიონზე მეტი მოთხოვნა მიიღეს. ამასთან, კამპანიის კიდევ ერთი წარმომადგენლის, ტიმ მორტოს თქმით, ქუჩაში სხვადასხვა აქციის მონაწილეებმა ტრამპის მხარდამჭერებს დარბაზში შესვლის საშუალება არ მისცეს, თუმცა ჟურნალისტები აღნიშნავენ, რომ ქალაქში ცოტა საპროტესტო აქცია იყო. მცირე დასწრების ერთ-ერთ მიზეზად კორონავირუსიც დასახელდa

The New York Times-ის ინფორმაციით, TikTok-ზე მილიონობით ნახვა ჰქონდა ვიდეოებს, სადაც მომხმარებლებს მოუწოდებდნენ, ტრამპის მიტინგზე ბილეთები მოეპოვებინათ. როგორც YouTube-ის ბლოგერი და კამპანიის ერთ-ერთი მონაწილე, ელაიჯა დენიელი ამბობს, ისინი ცდილობდნენ ინფორმაცია ჩუმად გაევრცელებინათ და ამისთვის ძირითადად Alt TikTok-ს იყენებდნენ.

"K-pop-ს, Twitter-სა და Alt TikTok-ს კარგი ალიანსი აქვთ, სადაც ერთმანეთის საშუალებით ინფორმაციას სწრაფად ავრცელებენ. ყველა მათგანმა იცის ალგორითმი და როგორ გაავრცელოს ვიდეო ისე, რომ სასურველი მიიღოს", — აღნიშნა დენიელმა.

მისივე თქმით, მომხმარებლების დიდი ნაწილი ვიდეოებს ერთ ან ორ დღეში შლიდა, რათა ინფორმაცია ინტერნეტში მასობრივად არ გავრცელებულიყო და ტრამპის კამპანიას ამის შესახებ არ გაეგო.