ევროპული საქართველოს ერთ-ერთი ლიდერი, დავით ბაქრაძის თქმით, საკონსტიტუციო ცვლილებების მეორე და მესამე მოსმენებზე პასუხისმგებლობა მთლიანად ქართული ოცნებაზე იქნება. ეს კომენტარი მან TV პირველის ეთერში გააკეთა და განმარტა, რომ მათ კანონპროექტი პირველ მოსმენაზე ხმისმიცემით "დააზღვიეს".

"ახლა პასუხისმგებლობის ტვირთი და ბურთი არის მთლიანად ქართული ოცნების მხარეს, ჩვენ დღეს დავაზღვიეთ და გადავარჩინეთ ის სცენარი, როდესაც დღევანდელი ჩაგდების შედეგად ქვეყანაში პროპორციული სისტემა ვეღარ შემოვიდოდა, ეს სცენარი დაზღვეულია და დამთავრდა", — თქვა დავით ბაქრაძემ.

ბაქრაძის განმარტებით, მეორე მოსმენაზე თუ კანონპროექტი ჩავარდება მეორე-მესამე დღესვე იქნება შესაძლებელი ხელახალი კენჭისყრა ჩატარდეს.

საქართველოს პარლამენტმა საკონსტიტუციო ცვლილებებს პირველი მოსმენით მხარი დაუჭირა. ცვლილებების თანახმად, არსებული საარჩევნო სისტემა უნდა შეიცვალოს და მომავალი მოწვევის პარლამენტში პარტიული სიით 77-ის ნაცვლად 120 დეპუტატს აირჩევენ, მაჟორიტარი კი 73-ის ნაცვლად მხოლოდ 30 იქნება. ცვლილებებს მხარი 136-მა დეპუტატმა დაუჭირა, 5-მა წინააღმდეგ მისცა ხმა.

ცვლილებებს მხარი დაუჭირა ევროპული საქართველომაც. დავით ბაქრაძის განცხადებით, პარტიამ ეს გადაწყვეტილება მიიღო, რათა ქართულ ოცნებას არ ჰქონდეს შესაძლებლობა, საარჩევნო სისტემის ცვლილებები კვლავ ჩააგდოს. მისივე თქმით, ასე დარჩება მეტი დრო იმისთვის, რომ შეთანხმება შესრულდეს "პოლიტიკური დევნის" ნაწილში და იმისთვის, რომ პროკურატურამ მიიღოს გადაწყვეტილება გიორგი რურუას გათავისუფლებასთან დაკავშირებით.

კენჭირსყრის დაწყებამდე ცნობილი გახდა, რომ ცვლილებებს მხარს არ დაუჭრდნენ: ემზარ კვიციანი, ნატო ჩხეიძე, ბიძინა გეგიძე, დავით ჭიჭინაძე და ალექსანდრე ერქვანია. კენჭისყრაში მონაწილეობა არ მიუღია ნაციონალურ მოძრაობასაც. ასევე, ცნობილი იყო, რომ უმრავლესობის მაჟორიტარი დეპუტატი, კახა ოქრიაშვილი ცვლილებებს მხარს არ დაუჭერდა.