საპარლამენტო უმრავლესობის წევრის, გიორგი კახიანის თქმით, მას ჰქონდა მოლოდინი, რომ გიორგი მარგველაშვილის პოლიტიკური კარიერა პრეზიდენტობით არ დასრულდებოდა. ამის შესახებ კახიანმა ლელოსა და ექსპრეზიდენტის სავარაუდო თანამშრომლობის შესახებ გავრცელებულ ინფორმაციაზე საპასუხოდ განაცხადა.

"ბატონ გიორგის პოლიტიკაში ყოფნა ადრეც უნდოდა, მაშინაც, როდესაც პრეზიდენტი იყო. მე პირადად, მის ქმედებებში ვხედავდი იმას, რომ პრეზიდენტობით არ დამთავრდებოდა მისი პოლიტიკური კარიერა, იგი აუცილებლად გააგრძელებდა ამას. მის ქმედებებში ეს აშკარად იკვეთებოდა. როგორც ჩანს, ახლა ნახე ეს მომენტი, მისთვის მისაღები პოლიტიკური ვითარება. მე არ მგონია, რომ მისი აქტივი ქართული ოცნებისთვის დიდი წინააღმდეგობის მომტანი იყოს", — თქვა კახიანმა.

საქართველოს ყოფილმა პრეზიდენტმა, გიორგი მარგველაშვილმა 20 მაისს თქვა, რომ პოლიტიკაში უკვე ჩართულია და მის შეხედულებებთან ყველაზე ახლოს ლელო დგას, თუმცა მაჟორიტარობას არ აპირებს.