მოძრაობა #სირცხვილიას ერთ-ერთი ლიდერი, აქტივისტი შოთა დიღმელაშვილი ამბობს, რომ მომავალი საპარლამენტო არჩევნები რეფერენდუმის ტოლფასია — ვირჩევთ დასავლეთსა და რუსეთს შორის. ეს განცხადება მან 20 ივნისის წლისთავზე გამართულ აქციაზე სიტყვის გამოსვლისას გააკეთა.

"მესმის, ამ არჩევნებზე თქვენი სატკივარი ისაა, რომ ბევრი ადამიანი ამ პოლიტიკურ ველში დისკრედიტირებულია. მესმის. მაგრამ რეალურად, ეს არჩევნები არის თან რეფერენდუმიც: რა პასუხს აძლევს ხალხი რუსეთს — უნდა მას ტერორისტების მრეცხავი, მათი დანაშაულის კვალის დამმალავი და საქართველოს წინააღმდეგ თანამზრახველი მთავრობა თუ უნდა რაღაც სხვა, უნდა ჭრელი და ბევრისთვის, თუნდაც ვიღაცისთვის არმოსაწონი კოალიცია. ჩვენი 20 ივნისის სცენა თავიდანვე იყო კონსოლიდაციის სცენა და ეს კონსოლიდაცია უნდა გაგრძელდეს, რადგან ძალა ერთობაშია. პოლარიზაციას ჩვენ უნდა მოვერიოთ და ყველამ ერთად გამოვუტანოთ განაჩენი ამ მთავრობას, რადგან ეს არჩევნები არის რეფერენდუმი. ვირჩევთ დასავლეთსა და რუსეთს შორის. გთხოვთ, თუნდაც ხრიოკი და ძნელად მისასვლელი გზით, მაგრამ გეზი მაინც ავირჩიოთ დასავლეთისკენ", — თქვა მან.

დღეს, რუსთაველის გამზირზე, გავრილოვის ღამიდან ერთი წლის შემდეგ, საპროტესტო აქცია გაიმართა. შეკრებილებმა ოკუპაცია და ხელისუფლების პოლიტიკა გააპროტესტეს.