კოლუმბიის ოფიციალური პირების განცხადებით, თვითმფრინავი, რომელსაც ბრაზილიის საფეხბურთო გუნდი შაპოკოენსე გადაჰყავდა, დაშვებამდე ცოტა ხნით ადრე, საწვავის გამოლევის გამო ჩამოვარდა. ინფორმაციას BBC ავრცელებს.

"თვითმფრინავში საწვავის საკმარისი მარაგი არ იყო" - განაცხადა ოფიციალურმა პირმა, მან წარმოადგინა აუდიო ჩანაწერი, რომელშიც პილოტი საწვავის სიმცირისა და ელექტრონული სისტემის პრობლემის გამო, დახმარებას ითხოვს.

თვითმფრინავი ბოგოტაში უნდა ჩაფრენილიყო საწვავის მარაგის შესავსებად, თუმცა ის კოლუმბიის ქალაქ მედელაინის მთიან ნაწილში ჩამოვარდა.

როგორც აღმოჩნდა, ბორტზე სულ 81 ადამიანის ნაცვლად, 77 იმყოფებოდა, რადგან 4-მა მათგანმა სხვადასხვა მიზეზების გამო თვითმფრინავში ასვლა გადაიფიქრა.

ამ ოთხი ადამიანიდან ერთი იყო პოლიტიკოსი, რომელსაც გუნდის მორიგ მატჩზე დასწრება სურდა, თუმცა საქმეების გამო წასვლა გადაიფიქრა. მეორე იყო სპორტული ჟურნალისტი, რომელმაც ამ ამბის გაშუქება კოლეგას დაუთმო, მესამე იყო ბრაზილიის ქალაქის მერი, ხოლო მეოთხე - კლუბის პრეზიდენტი.

77 ადამიანიდან ავიაკატასტროფას 6 გადაურჩა, მათგან 3 ფეხბურთელი, 2 ეკიპაჟის წევრი და 1 ჟურნალისტი, თუმცა 1 ფეხბურთელი საავადმყოფოში გადაყვანის შემდეგ გარდაიცვალა.